Тибқи фармоиши вазири маориф ва илми Ҷумҳурии Тоҷикистон шурӯъ аз оғози моҳи май тақсимоти мутахассисони ҷавон дар муассисаҳои таҳсилоти олии касбии кишвар ҷараён дорад. Дар ин доира тибқи тартиби муқаррарнамудаи Вазорати маориф ва илми Ҷумҳурии Тоҷикистон имрӯз дар Донишкадаи давлатии санъати тасвирӣ ва дизайни Тоҷикистон маҷлиси тақсимоти мутахассисони ҷавон дар соли хониши 2025-2026 баргузор гардид.
Дар чорабинии мазкур Бобозода Фаридун Толибҷон, муовини вазири фарҳанги Ҷумҳурии Тоҷикистон, Худойбердиева Ҷамила Чоршанбеевна, муовини ректор оид ба таълими Донишкада, Алихонзода Дилбар Алихон, сармутахассиси Раёсати кадрҳо ва корҳои махсуси Вазорати маориф ва илми Ҷумҳурии Тоҷикистон, Шарифзода Манучеҳр Муртазо, директори Муассисаи давлатии «Театри миллӣ»-и Дастгоҳи иҷроияи Президенти Ҷумҳурии Тоҷикистон, инчунин намояндагони муассисаҳои фарҳангӣ ва раёсату шуъбаҳои маорифи шаҳру ноҳияҳои ҷумҳурӣ ҳузур доштанд.
Нахуст маҷлисро муовини ректор оид ба таълим Худойбердиева Ҷамила Чоршанбеевна ифтитоҳ намуда, доир ба аҳамияти тақсимоти мутахассисони ҷавон ва нақши он дар таъмини муассисаҳои фарҳангию таълимии кишвар бо кадрҳои соҳибтахассус суханронӣ карда, зикр намуд, ки имсол Донишкадаро 64 нафар донишҷӯ дар гурӯҳҳои буҷавӣ хатм менамоянд ва ҳамаи онҳо ҳамчун мутахассисони ҷавон барои фаъолияти минбаъда омода гардидаанд.
Таъкид гардид, ки тайи солҳои охир таваҷҷуҳи давлату Ҳукумати Ҷумҳурии Тоҷикистон ба рушди соҳаи фарҳанг, санъат ва таҳсилоти касбӣ бештар гардида, барои омода намудани мутахассисони ҷавобгӯ ба талаботи замони муосир шароити мусоид фароҳам оварда шудааст. Дар ин замина, масъалаи бо ҷойи кор таъмин намудани хатмкунандагон яке аз самтҳои муҳими сиёсати давлатӣ дар соҳаи маориф ва фарҳанг ба ҳисоб меравад.
Сипас, муовини вазири фарҳанги Ҷумҳурии Тоҷикистон Бобозода Фаридун Толибҷон суханронӣ намуда, аз дастгирии пайвастаи Ҳукумати мамлакат нисбат ба ҷавонон ва мутахассисони соҳаи фарҳанг ёдовар шуда, иброз дошт, ки муассисаҳои фарҳангии кишвар имрӯз ба кадрҳои соҳибмаърифат, эҷодкор ва дорои ҷаҳонбинии муосир ниёз доранд ва хатмкунандагони Донишкада метавонанд дар рушди санъати миллӣ ва муаррифии фарҳанги тоҷик саҳми арзанда гузоранд.
Дар идомаи маҷлис Алихонзода Дилбар Алихон, сармутахассиси Раёсати кадрҳо ва корҳои махсуси Вазорати маориф ва илми Ҷумҳурии Тоҷикистон, тартиб ва низоми тақсимоти хатмкунандагонро шарҳу тавзеҳ дода, масъалаҳои марбут ба роҳхат, уҳдадориҳои мутахассисони ҷавон ва талаботи қонунгузории соҳаро фаҳмонид. Қайд гардид, ки тақсимоти имсола дар ҳамоҳангӣ бо ниёзҳои воқеии муассисаҳои фарҳангӣ ва таълимии кишвар ба роҳ монда шуда, ҳадафи асосӣ таъмини муассисаҳо бо кадрҳои ҷавону соҳибтахассус мебошад.
Номбурда хатмкунандагонро бо талаботи қарорҳои Ҳукумати Ҷумҳурии Тоҷикистон дар бораи «Тартиби тақсимот ва ба ҷойи кор таъмин намудани мутахассисони ҷавон» (аз 27.05.2017, №262) ва «Дар бораи тартиби баргардонидани маблағҳое, ки аз ҳисоби буҷети давлатӣ барои тайёр кардани мутахассисон харҷ шудаанд» (аз 29.11.2022, №563) шинос намуда, ҳуқуқ, уҳдадорӣ ва оқибатҳои риоя накардани санадҳои зикргардидаро ба онҳо фаҳмонид.
Сипас, тибқи тартиби муқаррарнамудаи Вазорати маориф ва илм аз ҷониби бахши таҷрибаомӯзӣ ва кор бо мутахассисони ҷавони Донишкада тақсимоти хатмкунандагон сурат гирифт. Дар ин ҷараён роҳбари бахши таҷрибаомӯзӣ ва кор бо мутахассисони ҷавон тартибу талаботи тақсимотро шарҳ дода, зикр кард, ки 64 нафар хатмкунандагони факултетҳои санъати тасвирӣ ва дизайн ба фаъолият сафарбар мегарданд. Ҳамин тавр, баъди суҳбат ҳамаи хатмкунандагони гуруҳҳои буҷавии Донишкада пурра бо ҷойи кор таъмин шуданд.
