Дар доираи корҳои таблиғотию иттилоотӣ ҷиҳати ҷалби ҷавонони соҳибистеъдод ба Донишкадаи давлатии санъати тасвирӣ ва дизайни Тоҷикистон вохӯрии Ректори Донишкада, номзади илмҳои меъморӣ Ҷурахонзода Сироҷиддин Шамсулло бо хатмкунандагони Коллеҷи санъати ба номи Содирхон Ҳофиз баргузор гардид.
Зимни вохӯрӣ Ректори Донишкада доир ба имкониятҳои таълимӣ, шароити таҳсил, пойгоҳи моддию техникӣ ва самтҳои асосии фаъолияти Донишкада ба хатмкунандагон маълумоти муфассал пешниҳод намуда, қайд намуд, ки имрӯз Донишкадаи давлатии санъати тасвирӣ ва дизайни Тоҷикистон ҳамчун ягона муассисаҳои бонуффузи соҳаи санъати тасвирӣ ва дизайн барои омода намудани мутахассисони баландихтисос нақши муҳим дорад.
Ректори Донишкада зимни суханронӣ иброз дошт, ки таваҷҷуҳи давлат ба рушди фарҳанг, санъат ва ҳунарҳои миллӣ сол аз сол бештар гардида, барои ҷавонони эҷодкор шароити мусоиди таҳсил ва такмили маҳорат фароҳам оварда мешавад. Донишкада имрӯз аз рӯи ихтисосҳои гуногуни соҳаҳои санъати тасвирӣ, дизайн, меъморӣ ва ҳунарҳои амалӣ мутахассис омода намуда, хатмкунандагони он дар муассисаҳои фарҳангӣ, таълимӣ ва ташкилотҳои эҷодӣ фаъолияти самаранок доранд.
Ҳамчунин, ба донишҷӯён оид ба тартиби қабул, имтиёзҳо, раванди таълим, иштироки донишҷӯён дар озмуну фестивалҳои ҷумҳуриявию байналмилалӣ ва имкониятҳои рушди истеъдод маълумот дода, зикр гардид, ки Донишкада барои ҷавонони соҳибзавқу эҷодкор муҳити мусоиди таълимӣ фароҳам оварда, ҷиҳати рушди қобилияти касбии онҳо таваҷҷуҳи махсус зоҳир менамояд.
Дар анҷоми чорабинӣ миёни Ректор ва донишҷӯён суҳбати озод баргузор гардида, ҷонибҳо атрофи рушди соҳаи санъат, тарбияи кадрҳои ҷавони соҳибмаҳорат ва ҷалби истеъдодҳои нав ба муассисаҳои таҳсилоти олии санъат табодули назар намуданд.
Дар рафти мулоқот хатмкунандагони Коллеҷ ба масъалаҳои марбут ба ихтисосҳо, имкониятҳои идомаи таҳсил, фаъолияти эҷодӣ ва дурнамои касбӣ таваҷҷуҳ зоҳир намуда, ба суолҳои худ посухҳои мушаххас гирифтанд. Вохӯрӣ дар фазои самимӣ ва ҳусни тафоҳум анҷом ёфта, барои иштирокчиён таассуроти хуб ба ҷой гузошт.
