12 майи соли равон дар Донишкадаи давлатии санъати тасвирӣ ва дизайни Тоҷикистон Фестивали мӯд таҳти унвони «Аз Наврӯз то Наврӯз» бо иштироки доираи васеи намояндагони соҳаи фарҳанг, ҳунар ва тарроҳони кишвар баргузор гардид.
Дар чорабинӣ ректори Донишкадаи давлатии санъати тасвирӣ ва дизайни Тоҷикистон Ҷурахонзода Сироҷиддин Шамсулло, сардори шуъбаи идоракунии корҳо ва назорати дастгоҳи марказии Вазорати фарҳанги Ҷумҳурии Тоҷикистон Айдаршозода Диловар Фарҳод, ректори Донишкадаи давлатии фарҳанг ва санъати Тоҷикистон ба номи Мирзо Турсунзода Назарзода Маҳмуд Мирзо, мудири шуъбаи таблиғот ва иттилооти Дастгоҳи марказии Кумитаи иҷроияи Ҳизби Халқии Демократии Тоҷикистон Ширинбекзода Садриддин Авазбек, муовини раиси Кумитаи иҷроияи Ҳизби Халқии Демократии Тоҷикистон дар шаҳри Душанбе Фазилатпочо Маҳмадюсуф, раиси Кумитаи иҷроияи ҲХДТ дар ноҳияи Шоҳмансур Каримзода Нилуфар Раҳмоналӣ, инчунин муовинони ректор, тарроҳони маъруфи кишвар, омӯзгорон, кормандон ва донишҷӯён иштирок намуданд.
Чорабиниро Ректори Донишкада номзади илмҳои меъморӣ Ҷурахонзода Сироҷиддин Шамсулло ифтитоҳ намуда, аз аҳамияти рушди санъати дизайн ва мӯди миллӣ дар шароити муосир ёдовар шуда, қайд кард, ки чунин фестивалҳо барои дарёфти истеъдодҳои ҷавон, муаррифии фарҳанги миллӣ ва рушди соҳаи тарроҳӣ мусоидати муҳим менамоянд. Фестивали мазкур аз замони таъсисёбии муассиса баргузор гардида, ҳамасола намунаи корҳои эҷодии донишҷӯёни ихтисоси тарҳрезии бадеии либос дар он ба маърази тамошо гузошта мешаванд.
Дар идомаи фестивал коллексияҳои эҷоднамудаи донишҷӯёни ихтисосҳои гуногуни факултети дизайн ва либосҳои миллӣ ба намоиш гузошта шуданд. Либосҳои пешниҳодшуда бо истифода аз унсурҳои миллӣ, нақшу нигори анъанавӣ ва равияҳои муосири тарроҳӣ таҳия гардида, таваҷҷуҳи меҳмонон ва дӯстдорони санъати мӯдро ба худ ҷалб намуданд.
Иштирокчиёни фестивал таъкид карданд, ки имрӯз мӯди миллӣ ҳамчун бахши муҳими фарҳанги миллӣ дар муаррифии ҳунару анъанаҳои мардум нақши муассир дорад. Таъкид шуд, ки пайвастани унсурҳои миллӣ бо услубҳои муосир метавонад барои муаррифии фарҳанги тоҷик дар арсаи байналмилалӣ заминаи мусоид фароҳам оварад.
Ҳамчунин, дар ҷараёни чорабинӣ фаъолияти донишҷӯёни фаъол ва омӯзгорони тахассусӣ қадрдонӣ гардида, ба онҳо сипоснома ва туҳфаҳои хотиравӣ тақдим карда шуд. Фестивал дар фазои гарму самимӣ баргузор гардида, ҳамчун майдони муаррифии истеъдодҳои ҷавон, рушди фарҳанги либоспӯшӣ ва тарғиби санъати тарроҳии миллӣ арзёбӣ гардид.
