Дар Донишкадаи давлатии санъати тасвирӣ ва дизайни Тоҷикистон даври ҷамъбастии Озмуни ҷумҳуриявии «Тоҷикистон – Ватани азизи ман» аз рӯйи номинатсияҳои «Санъати тасвирӣ» ва «Дизайн» идома дорад.
14 октябри соли 2026 дар Донишкадаи давлатии санъати тасвирӣ ва дизайни Тоҷикистон даври сеюми Озмуни ҷумҳуриявии «Тоҷикистон – Ватани азизи ман» аз рӯйи номинатсияҳои «Санъати тасвирӣ» ва «Дизайн» оғоз гардида, 3 рӯз боз миёни иштирокчиён идома дорад. Ин марҳилаи муҳими озмун то 22 октябр идома ёфта, дар он довталабони соҳибистеъдод маҳорати касбӣ, ҷаҳонбинии эҷодӣ, завқи баланди зебоипарастӣ ва қобилияти офаридани асарҳои дорои арзиши бадеиро ба намоиш мегузоранд.
Дар маросими ифтитоҳи даври ҷамъбастии номинатсияҳои мазкур Вазири фарҳанги Ҷумҳурии Тоҷикистон Сатториён Матлубахон Амонзода ва ректори Донишкадаи давлатии санъати тасвирӣ ва дизайни Тоҷикистон Ҷӯрахонзода Сироҷиддин Шамсулло иштирок намуданд. Онҳо бо ҳайати ҳакамон ва иштирокчиёни озмун суҳбат карда, ба раванди баргузории чорабинӣ, сатҳи омодагии довталабон ва аҳаммияти ин иқдоми фарҳангӣ таваҷҷуҳ зоҳир карданд.
Гуфта шуд, ки баргузории даври ҷамъбастии озмун дар заминаи сиёсати фарҳангпарваронаи Ҳукумати Ҷумҳурии Тоҷикистон ва таваҷҷуҳи пайваста ба рушди санъату ҳунар, дарёфти истеъдодҳои ҷавон ва фароҳам овардани шароити мусоид барои такмили маҳорати эҷодии онҳо сурат мегирад. Чунин чорабиниҳо барои муайян намудани чеҳраҳои нави ҳунар, дастгирии ҷавонони эҷодкор ва таҳкими робитаи наслҳо дар соҳаи фарҳанг заминаи мусоид фароҳам меоранд.
Дар ин миён, баргузории озмун аз рӯйи номинатсияҳои «Санъати тасвирӣ» ва «Дизайн» дар Донишкадаи давлатии санъати тасвирӣ ва дизайни Тоҷикистон аҳаммияти хос дорад. Зеро муассисаи мазкур ҳамчун яке аз марказҳои муҳими омодасозии мутахассисони соҳаи санъати тасвирӣ ва дизайн барои рушди ҳунарҳои бадеӣ, ташаккули тафаккури эҷодӣ ва тарбияи насли нави рассомону дизайнерон саҳми назаррас мегузорад.
Санъати тасвирӣ ҳамчун яке аз шаклҳои муҳими дарки воқеият ва ифодаи арзишҳои маънавию фарҳангӣ дар муаррифии таърих, табиат, зиндагии мардум, анъанаҳои миллӣ ва ормонҳои ҷомеа нақши муҳим дорад. Асарҳои рассомӣ метавонанд тавассути образҳои бадеӣ, ранг, шакл ва таркиб андешаҳои иҷтимоӣ, эҳсосоти инсонӣ ва хусусиятҳои фарҳанги миллиро бозтоб намоянд. Аз ин рӯ, иштироки ҷавонони эҷодкор дар чунин озмунҳо барои муайян намудани истеъдодҳои нав, рушди маҳорати касбӣ ва ташаккули ҷаҳонбинии бадеии онҳо имконияти муносиб фароҳам меорад.
Номинатсияи «Дизайн» низ дар шароити рушди босуръати технология, тағйирёбии талаботи ҷомеа ва густариши соҳаҳои гуногуни фаъолияти эҷодӣ аҳаммияти рӯзафзун пайдо кардааст. Дизайн дар пайванди санъат, тафаккури навоварона ва талаботи амалии инсон ташаккул ёфта, дар тарҳрезии муҳити зист, маҳсулот, либос, фазои меъморӣ, воситаҳои иттилоотӣ ва дигар самтҳо истифода мешавад. Иштироки довталабон дар ин номинатсия имкон медиҳад, ки қобилияти эҷодкорӣ, навоварӣ, дарки мутаносибии шаклу ранг ва маҳорати татбиқи ғояҳои бадеии онҳо арзёбӣ гардад.
Муҳим он аст, ки иштирокчиёни озмун бо асарҳо ва тарҳҳои худ метавонанд диди инфиродӣ, завқи эстетикӣ ва муносибати хешро ба арзишҳои миллӣ муаррифӣ намоянд. Дар шароити муосир рушди санъати тасвирӣ ва дизайн тақозо мекунад, ки эҷодкорон дар баробари аз худ намудани дастовардҳои навини ҷаҳонӣ ба мероси ғании фарҳангии халқи тоҷик низ такя кунанд. Омезиши анъанаҳои миллӣ бо андешаҳои нав ва равишҳои муосири эҷодӣ метавонад барои офаридани асарҳои дорои мазмуну шакли тоза замина гузорад.
Ёдовар мешавем, ки дар даври ҷамъбастии Озмуни ҷумҳуриявии «Тоҷикистон – Ватани азизи ман» дар маҷмӯъ 581 довталаб иштирок менамояд. Марҳилаи мазкур аз рӯйи номинатсияҳои гуногун дар Театри давлатии академии опера ва балети ба номи Садриддин Айнӣ, Донишкадаи давлатии санъати тасвирӣ ва дизайни Тоҷикистон ва Оркестри давлатии симфонии Тоҷикистон баргузор мегардад. Довталабон дар номинатсияҳои оҳангсозӣ-бастакорӣ, сарояндагӣ, навозандагӣ, санъати тасвирӣ ва дизайн ҳунару истеъдоди худро муаррифӣ мекунанд.
Озмуни ҷумҳуриявии «Тоҷикистон – Ватани азизи ман» соли ҳаштум аст, ки таҳти сарпарастии Президенти Ҷумҳурии Тоҷикистон муҳтарам Эмомалӣ Раҳмон баргузор мегардад. Ҳадафи асосии он дарёфти истеъдодҳои нав дар соҳаҳои санъати мусиқӣ, сарояндагӣ, санъати тасвирӣ ва дизайн, баланд бардоштани маҳорати касбӣ ва завқи зебоипарастӣ, тақвияти ҳунари иҷрокунандагӣ, таблиғу эҳёи ҳунарҳои мардумӣ, муаррифии фарҳанги миллӣ ва арҷгузорӣ ба суннатҳои неки аҷдодӣ мебошад.
Ҳамзамон, озмун барои муайян ва қадрдонӣ намудани асарҳои арзишманди мусиқӣ, эҷодӣ ва рассомӣ, интихоби намунаҳои беҳтарини оҳангу суруд ва асарҳои тасвирие, ки фарҳанги гузаштаву имрӯзаи миллати тоҷикро инъикос менамоянд, мусоидат мекунад.
Даври ҷамъбастии озмун барои иштирокчиён имтиҳони муҳими маҳорати касбӣ ва эҷодӣ ба шумор рафта, имконият фароҳам меорад, ки дастовардҳои худро дар назди ҳайати ҳакамон муаррифӣ намуда, барои расидан ба натиҷаҳои баланд талош варзанд. Натиҷаҳои чунин чорабиниҳо метавонанд дар муайян намудани самтҳои минбаъдаи рушди истеъдодҳои ҷавон ва таҳкими мавқеи санъату ҳунар дар ҷомеа нақши муассир гузоранд.
Маросими ҷоизасупорӣ ба ғолибони Озмуни ҷумҳуриявии «Тоҷикистон – Ватани азизи ман» ва барномаи фарҳангӣ бо иштироки ғолибон 23 октябри соли 2026 дар Театри давлатии академии опера ва балети ба номи Садриддин Айнӣ баргузор мегардад.
