Имрӯз дар Донишкадаи давлатии санъати тасвирӣ ва дизайни Тоҷикистон ба муносибати Рӯзи омӯзгор ва Рӯзи забони давлатии Ҷумҳурии Тоҷикистон ҳамоиши тантанавӣ баргузор гардид, ки дар он роҳбарияти Донишкада, кормандон, омӯзгорон ва донишҷӯёни муассиса иштирок намуда, нақши омӯзгорро дар тарбияи насли ҷавон ва аҳамияти забони давлатӣ дар таҳкими худшиносии миллӣ ва рушди фарҳангу маърифати ҷомеаро мавриди баррасӣ қарор доданд.
Ҳамоиши тантанавӣ дар фазои идона баргузор гардида, иштирокчиён бо таърихи ташаккул ва мақоми омӯзгор, рисолати касбии аҳли таълиму тарбия ва ҷойгоҳи забони давлатӣ дар ҳаёти иҷтимоӣ, фарҳангӣ ва маънавии кишвар андешаронӣ намуданд. Таъкид гардид, ки омӯзгор дар ҷомеа ҳамчун роҳнамои тарбия ва маърифат нақши калидӣ дошта, бо дониш, таҷриба ва фаъолияти созандаи худ дар ташаккули ҷаҳонбинӣ, маърифати касбӣ ва ахлоқии ҷавонон саҳми арзанда мегузорад.
Нахуст муовини ректор оид ба таълим Ҷамила Худойбердиева суханронӣ намуда, ҳозиринро ба муносибати Рӯзи омӯзгор ва Рӯзи забони давлатӣ табрик гуфт. Ӯ зимни суханронӣ аз мақоми омӯзгор дар низоми таҳсилоти олӣ ва нақши он дар омода намудани мутахассисони ҷавобгӯ ба талаботи замони муосир ёдовар шуда, таъкид намуд, ки фаъолияти омӯзгор дар муассисаи таҳсилоти олӣ бо таълими донишҷӯён маҳдуд нашуда, ба ташаккули ҷаҳонбинӣ, маърифати шаҳрвандӣ, завқи зебоипарастӣ ва эҳсоси масъулияти онҳо дар назди ҷомеа низ таъсири амиқ мерасонад.
Зикр гардид, ки дар Донишкадаи давлатии санъати тасвирӣ ва дизайни Тоҷикистон омӯзгорон дар баробари таълими донишҳои назариявӣ ва амалӣ, барои рушди истеъдоди эҷодии донишҷӯён, такмили маҳорати касбӣ ва омодасозии мутахассисони соҳаи санъат ва дизайн фаъолияти мунтазам анҷом медиҳанд. Маҳз тавассути заҳмати омӯзгорон ва устодони соҳибтаҷриба муҳити созандаи таълимию эҷодӣ дар Донишкада ташаккул ёфта, барои рушди қобилияти эҷодии ҷавонон шароити мусоид фароҳам оварда шудааст.
Дар идомаи чорабинӣ дотсенти кафедраи забонҳо ва фанҳои гуманитарӣ Сайнуриддин Акобиров баромад намуда, дар бораи ҷойгоҳи забони давлатӣ ҳамчун рукни муҳими давлатдорӣ ва омили пайванди маънавии ҷомеа сухан гуфт. Ӯ таъкид кард, ки забон дар ҳифзи таъриху фарҳанг, арзишҳои миллӣ ва худшиносии мардум нақши бузург дошта, омӯзишу истифодаи дурусти он аз ҷумлаи вазифаҳои муҳими ҳар як шаҳрванди кишвар ба ҳисоб меравад.
Ҳамзамон, дар суханронӣ ба масъалаи риояи меъёрҳои забони тоҷикӣ дар муҳити таълимӣ ва фаъолияти касбӣ таваҷҷуҳ зоҳир карда шуд. Таъкид гардид, ки донишҷӯёни муассисаи таҳсилоти олӣ бояд дар баробари аз худ намудани ихтисоси интихобкардаи худ ба фарҳанги сухан, саводи забонӣ ва истифодаи дурусти забони давлатӣ дар фаъолияти минбаъдаи касбӣ низ аҳамияти ҷиддӣ диҳанд. Барои донишҷӯёни соҳаи санъат ва дизайн ин масъала аҳамияти хос дошта, забон ҳамчун воситаи муҳими ифодаи андеша, муаррифии эҷодиёт ва муоширати касбӣ хизмат менамояд.
Дар идома донишҷӯёни Донишкада бо қироати шеърҳои ба забони тоҷикӣ, Ватан, омӯзгор ва арзишҳои миллӣ бахшида ба чорабинӣ ҳусни тоза бахшиданд. Қироати шеър аз ҷониби донишҷӯён ба фазои ҳамоиш рӯҳияи идона бахшида, маҳорати суханварӣ ва завқи адабии ҷавононро инъикос намуд.
Сипас, аз ҷониби Кумитаи иттифоқҳои касабаи муттаҳидаи кормандону донишҷӯёни Донишкада ба як қатор омӯзгорони собиқадор ва ҷавони муассиса мукофотпулӣ тақдим карда шуд. Ин иқдом ҳамчун нишонаи эҳтиром ба заҳмати омӯзгорон ва қадрдонӣ аз саҳми онҳо дар рушди соҳаи таълиму тарбия ва фаъолияти донишкада сурат гирифта, барои устодон ва омӯзгорони ҷавон рӯҳияи тоза бахшид.
Қисмати фарҳангии ҳамоиш низ бо барномаи ҷолибу рангин идома ёфт. Дар ин бахши чорабинӣ овозхонҳои Ансамбли давлатии «Фалак»-и Кумитаи телевизион ва радиои назди Ҳукумати Ҷумҳурии Тоҷикистон ҳунарнамоӣ намуда, сурудҳои дилнишинро пешкаши иштирокчиён гардониданд. Суруду оҳангҳои миллӣ ба чорабинӣ ҳусни хоса бахшида, фазои толорро бо рӯҳияи идона ва эҳсоси муҳаббат ба фарҳангу ҳунари миллӣ фаро гирифтанд.
