Санаи 12-уми феврали соли 2024 дар толори намоишии Донишкадаи давлатии санъати тасвирӣ ва дизайни Тоҷикистон намоиши инфиродии асарҳои эҷодии Арбоби ҳунари Тоҷикистон Анваршо Сайфудинов баргузор гардид. Дар кори намоиш вазири фарҳанги Ҷумҳурии Тоҷикистон Сатториён Матлубахон Амонзода, директори Коллеҷи ҷумҳуриявии рассомии ба номи М. Олимов Ҷурахонзода Сироҷиддин, Рассоми халқии Тоҷикистон Шарипов Савзаалӣ Неъматович, Шоири халқии Тоҷикистон Гулрухсор Сафиева ва намояндагони сафоратхонаҳои ҷумҳуриҳои Корея, Қазоқистон, Ҳиндустон ва Покистон, аъзои оилаи ӯстод, кормандону омӯзгорон ва донишҷӯёни Донишкадаи давлатии санъати тасвирӣ ва дизайни Тоҷикистон ширкат варзиданд.
Ёдовар шудан ба маврид аст, ки номбурда аз рӯи техникаҳои гуногуни мусаввирӣ наққошӣ, кундал, мозайка ва дигар навъи техникаҳо кор мекунад. Иштирокчии намоишҳои зиёди ҷумҳуриявӣ ва байналмилалӣ мебошад. Силсилаи намоишҳои шахсии рассом хеле зиёданд. Эҷодиёти рассом дар осорхонаҳо, коллексияҳои шахсии Тоҷикистон, Россия ва Аврупо мавҷуданд. Анваршо Сайфудинов миёни дигар рассомон мақому ҷойгоҳи хоси худро дошта, устоди садҳо шогирд ба шумор меравад. Барои пайдо кардани сабки хосаи худ ва омезиши рассом солҳои 1990-2000-ум ба офаридаи силсилаи композитсияҳои беашё сар кард, ки он яке аз сабкҳои навоваронаи эътирофшуда дар санъати тасвирии муосири тоҷик мебошад. Умуман дар эҷодиёти ӯ эҳсосот ва тахайюлоти бою рангин бо ҳисси хело нишонрасу таъсирбахш бинандаро ба ваҷд меорад. Қобили зикр аст, ки Анваршо Сайфудинов то имруз дар Донишкадаи давлатии санъати тасвирӣ ва дизайни Тоҷикистон барои мукаммал гардонидани системаи таълимии соҳаи санъати тасвирӣ ва дизайн, инчунин лоиҳаҳои рушди соҳа хизматҳои арзанда менамояд. Дар фарҷоми намоиш устод Анваршо Сайфудинов арзи сипос намуда, минатдории хешро баён карданд.
