Дирӯз дар толори намоишии Донишкадаи давлатии санъати тасвирӣ ва дизайни Тоҷикистон намоиши инфиродии омӯзгори кафедраи мусаввирӣ ва ҳайкалтарошии факултети санъати тасвирии Донишкада Искандаров Ҳасан Музаффарович таҳти унвони “Пайроҳаи эҷод” баргузор гардид.
Намоишро бо сухани муқаддимавӣ Ҷурахонзода Сироҷиддин Шамсулло, ректори Донишкадаи давлатии санъати тасвирӣ ва дизайни Тоҷикистон, ифтитоҳ карда, иброз дошт, ки Ҳасан Искандаров умри ҷавонашро ба тасвиргарӣ бахшида, ҳоло яке аз рассомони ҷавони болаёқат дар самти санъати тасвирӣ – живопис аст, ки дар баробари тасвиргарии худ, ҳамзамон, яке аз омӯзгорони фаъоли Донишкада буда, дар роҳи таълиму тарбияи насли нави расомон нақши арзанда дорад.
Сипас, Алиакбар Ҳаётзода, сардори шуъбаи илм ва муассисаҳои таълимии Вазорати фарҳанги Ҷумҳурии Тоҷикистон, суханронӣ намуда, гуфт, Ҳасан Искандаров аз зумраи он мониқаламонест, ки солҳо боз ба рассомӣ машғул асту бо диди ҷолибу ҷаззобаш асарҳои дилписанд меофарад ва симои нобиғаҳоро тасвир мекунад.
Дар идомаи чорабинӣ Рассоми халқии Тоҷикистон Сабзалӣ Муродзодаи Шариф дар мавриди сабки офариниши рассом изҳори назар карда, таъкид намуд, ки Ҳасанро доштани равияи махсус ё сабку услуби инфиродӣ миёнаи дигар рассомони маъруф тафовутпазир карда. Ӯ ҳангоми тасвир бо шеваҳои гуногун ва истифодаи рангҳои ҷолиб асар меофарад, ки шаҳодати диди навпарастӣ ва завқи баланди эҷодиаш аст.
“Ҳадафи ӯ дар эҷод ифодаи эҳсосоти амиқи инсон ва робитаи ӯ бо табиату ҷомеа тавассути рангҳо буда, дар офаридаҳояш урфу одати миллӣ ва зиндагии ҳаррӯзаи мардуми тоҷикро бештар таҷассум мекунад. Ин омил ҳамчун як воситаи ошкорсозии андешаҳо ва ифодаи ҳиссиёти шахсӣ, ки ба инсонҳо барои дарки ҷаҳон ва тасвир кардани хоҳишҳои тахаюлӣ кӯмак мерасонад, истифода мешавад”, – гуфт Рассоми халқии Тоҷикистон Сабзалӣ Муродзодаи Шариф.
Баъдан, Раиси Иттифоқи рассомони Тоҷикистон Наргис Ҳамидова ба сухан баромада, дар маври нақши Ҳасан Искандаров дар пешбурди муваффақият ва муаррифии Иттифоқи рассомони Тоҷикистон суханронӣ карда, таъкид дошт, ки Ҳасан Искандаров рассоми ҷавону навоварест, ки дар намудҳои гуногуни соҳаи санъати тасвирӣ қалам давонда, чун санъати ороишӣ-амалӣ, монументалӣ, мозайка, фреска, релеф, манзаранависии дастгоҳӣ, кундал ва ғайраҳо.
Ҳамзамон, Аслиддин Низомов, мудири шуъбаи санъатшиносии Академияи миллии илмҳои Ҷумҳурии Тоҷикистон, суханронӣ карда, иброз дошт, ки Ҳасан ҳамчун рассоми ҷавон дар асарҳояш на танҳо манзараро воқеъбинона тасвир мекунад, балки тавассути рангҳо, нур ва соя эҳсосоту фикрҳои шахсиро ифода мекунад. Ӯ барои офаридани чунин асарҳо бештар рангҳои равғанӣ, обӣ, ё акрилӣ истифода мебарад.
Баъдан, номбурда туҳфаи Президенти Академиияи миллии илмҳои Тоҷикистон, узви вобастаи АМИТ Қобилҷон Хушвахтзодаро ба аҳли ҳунари Донишкада тақдим кард. Туҳфаи мазкурро ректори Донишкада Сироҷиддин Ҷурахонзода қабул карда, ба роҳбарияти АМИТ ҷиҳати таваҷҷуҳашон ба фаъолияти Донишкада ва қадршиносии аҳли ҳунари он изҳори амиқи миннатдорӣ намуданд.
Дар чорабинӣ, инчунин, директори Коллеҷи ҷумҳуриявии рассомии ба номи Мирзораҳмат Олимов Умед Бозоров, муовини раиси Иттифоқи дизайнерони Тоҷикистон Манзура Улҷабоева, декани факултети санъати тасвирии Донишкада Мизроб Холов ва волидайни Ҳасан Искандаров баромад карданд.
Дар анҷоми қисмати ифтитоҳии чорабинӣ худи Ҳасан Искандаров суханронӣ карда, ба раёсати Донишкада ва ҳамаи онҳое, ки дар баргузории намоиши инфиродии асарҳояш саҳм доштанд, изҳори миннатдорӣ карда, ваъда дод, ки дар оянда баҳри рушди санъати тасвирӣ ва тарбияи шогирдони бештар дар ин самт боз ҳам бештару беҳтар саҳм мегузорад.
Сипас, меҳмонон ба тамошои маҳсули тахаюли рассом пардохтанд. Қайд гардид, ки намоиши мазкур то 10-уми марти соли 2025 идома мекунад. Хоҳишмандон метавонанд дар ин муддат бо олами тахаюлот ва офаридаҳои ин рассоми чирадаст аз наздик ошно шуда, дар мавриди ҳунари тасвиргариаш маълумоти комил гиранд.
