Таҳти ин унвон 5 ноябри соли равон дар Донишкадаи давлатии санъати тасвирӣ ва дизайни Тоҷикистон ҷиҳати пешгирии зӯроварӣ ва кирдорҳои ношоиста дар оила, баланд бардоштани маърифати ҳуқуқӣ, мавқеи занон дар хонавода ва ҷомеа, муносибати эҳтиромона, бехатар ва рафоқати инсонӣ, таҳкими муносибатҳои оилаву оиладорӣ, ҷалби ҷавондухтарон ба таҳсилоти миёнаи касбӣ ва олӣ, тарғиби ташаккули тарзи ҳаёти солим ҳамоиши маърифатӣ-ҳуқуқӣ дар доираи амалиёти “16-рӯзи мубориза бар зидди зӯроварӣ” доир гардид.
Дар кори конференсия муовини ректор оид ба таълим Худойбердиева Ҷамила Чоршанбиевна, муовини ректор оид ба тарбия ва робитаҳои байналмилалӣ Давлатзода Гулнора Шариф, директори Муассисаи давлатии “Маркази минтақавии хизмати иҷтимоӣ ба нафақахӯрон ва маъюбони шаҳри Душанбе” Музафарзода Парвина, сармутахассиси Раёсати кор бо занон ва оилаи Мақомоти иҷроияи ҳокимияти давлатии шаҳри Душанбе Қаюмзода Дилноза ва занону бонувони Донишкада иштирок намуданд.
Ҳамоишро муовини ректор оид ба тарбия ва робитаҳои байналмилалӣ Давлатзода Гулнора Шариф ифтитоҳ намуда, қайд кард, ки ҳимояи оила ҳамчун асоси ҷамъият, танзими ҳуқуқии муносибатҳо вобаста ба пешгирии зӯроварӣ дар оила, мусоидат намудан ба татбиқи сиёсати давлатӣ оид ба пешгирии зӯроварӣ дар оила, ташаккули вазъи тоқатнопазирии ҷомеа нисбат ба зӯроварӣ дар оила, ошкор, пешгирӣ ва бартарафсозии зӯроварӣ дар оила, мусоидат ба баланд бардоштани масъулияти падару модар дар таълиму тарбияи кӯдак, таъмини сиёсати самараноки гендерӣ дар кишвар, роҳ надодан ба зӯроварию табъиз дар муносибатҳои оилавӣ, ташаккули низоми созандаи муносибатҳо дар он, ҳимояи ҳуқуқу озодиҳои ҳар як шахс ва боло бурдани маърифати ҳуқуқии аъзои ҷомеа маҳсуб меёбад.
Дар идомаи чорабинӣ сармутахассиси Раёсати кор бо занон ва оилаи Мақомоти иҷроияи ҳокимияти давлатии шаҳри Душанбе Қаюмзода Дилноза суханронӣ карда, иброз дошт, ки Раёсати кор бо занон ва оилаи шаҳри Душанбе бо мақсади иҷрои банди 8-и «Нақшаи чорабиниҳои Мақомоти иҷроияи ҳокимияти давлатии шаҳри Душанбе барои солҳои 2025-2027 оид ба амалисозии «Барномаи давлатӣ оид ба пешгирии зӯроварӣ дар оила дар Ҷумҳурии Тоҷикистон барои солҳои 2025-2030», ки бо қарори Раиси шаҳри Душанбе аз 8 майи соли 2025, №290 тасдиқ гардидааст, баргузории силсилаи вохӯриҳоро дар ин мавзуъ дар тамоми муассисаҳои шаҳри Душанбе доир намуда истодааст.
Сипас, директори Муассисаи давлатии “Маркази минтақавии хизмати иҷтимоӣ ба нафақахӯрон ва маъюбони шаҳри Душанбе” Музафарзода Парвина қайд кард, ки оила иттифоқи озод, ихтиёрӣ ва баробарҳуқуқӣ байни зану мард буда, дар асоси муҳаббату эҳтироми тарафайн, бо мақсади ташкили хонавода ва идомаи насл ташкил карда шуда, таҳти ҳимояи давлат қарор дорад.
“Ҷумҳурии Тоҷикистон дар баробари ба даст овардани Истиқлоли давлатӣ, ваҳдати миллӣ рушди давлати демократии ҳуқуқбунёдро, ки асосҳои он дар санади олии кишвар-Конститутсияи Ҷумҳурии Тоҷикистон ба таври возеҳу равшан инъикос гардидаанд, пеша намуд. Ҳифзи ҳуқуқ ва озодиҳои инсон ва шаҳрванд яке аз усулҳои муайянсозандаи давлати ҳуқуқбунёду демократӣ мебошад, ки дар ин самт аҳамияти махсусан муҳими амалиро масалаи ҳуқуқ ва озодиҳои занон, ҳамчунин ҳифзи ҳуқуқу манфиатҳои онҳо дар бар мегирад”, – гуфта шуд дар ҳамоиш.
Дар хотимаи чорабинӣ ба иштирокдорон буклету варақаҳои тарғиботӣ тақсим гардида, моҳияти иқдоми мазкур фаҳмонида шуд.
