Имрӯз дар толори намоишии Донишкадаи давлатии санъати тасвирӣ ва дизайни Тоҷикистон бо ташаббуси факултети саньати тасвирӣ бахшида ба Рӯзи модар чорабинии маърифатӣ-фароғатӣ баргузор гардид.
Ҳамоишро бо сухани муқаддимавӣ Зарнигор Сафарова, муовини декан оид ба тарбия ва корҳои эҷодӣ, ифтитоҳ намуда, қайд кард, ки Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар суханрониҳои худ роҷеъ ба бузургдошти модарони азизамон пайваста ҳарф зада, ба мақому манзалати онҳо ҳамеша арҷ мегузоранд. Ба таъкиди Пешвои миллат муҳтарам Эмомалӣ Раҳмон “Дар таърихи тамаддуни башар шоир, нависанда ё файласуферо пайдо кардан амри маҳол аст, ки дар васфи зан ва иззату эҳтироми ӯ сухане нагуфта бошад, зеро зан – модар сарчашмаи ҷовидонии ҳаёт ва манбаи эҷод аст. Ниёгони соҳибхиради мо барои наслҳои инсоният доир ба эҳтирому бузургдошти зан – модар суханҳои пурҳикмат ва пурарзиш ба ёдгор мондаанд”.
“Вақте ки вожаи муқаддаси модарро ба забон меорем, пеш аз ҳама, дар назар симои ҷаззобу нуронии шахси бароямон ҳамеша азизу арҷманд, гаронмоятарин мавҷуди рӯйи замин ва сароғози ҳастии насли башар, сарчашмаи мусаффои меҳру муҳаббат, ягона шахси дар пастию баландиҳои рӯзгор барои инсон мунису ғамхор ва дар маҷмуъ, офарандаву идомадиҳандаи зиндагии инсон ҷилвагар мешавад. Зеро, агар хуршед бо анвори хеш ҷаҳонро файзу рӯшноӣ ва хуррамӣ бахшад, пас, меҳру муҳаббат ва раҳму шафқати зан – модар нури зиндагии инсон, сарчашмаи саршори рӯзгор ва ободию осудагии ҳар хонавода маҳсуб меёбад”, – гуфт Наврӯз Саидов.
