Дар Донишкадаи давлатии санъати тасвирӣ ва дизайни Тоҷикистон бо иштироки ректори Донишкада, н.и.м., профессор Ғанизода Ҷамшед Шуҷоат, муовини вазири фарҳанги Ҷумҳурии Тоҷикистон Шарифзода Манучеҳр Муртазо, муовинони ректор, ҳайати профессорону омӯзгорон ва донишҷӯёну магистрантон тамошои дастаҷамъонаи пахши мустақими суханронии Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар Донишгоҳи давлатии тиббии вилояти Хатлон дар шаҳри Данғара бахшида ба Рӯзи дониш ва Дарси сулҳ, сурат гирифт.
Зимни суханронии хеш Пешвои миллат оид ба нақши калидии маориф дар рушду инкишофи ҷомеа ва давлат андешаронӣ намуда, таъкид доштанд, ки: “… Ниёгони бузурги миллати тоҷик дар масири таърихи бостонии халқамон ба омӯхтани илму маърифат ва касбу ҳунар таваҷҷуҳи хосса зоҳир намуда, тавассути осори ҷовидонаи худ инсониятро ба роҳи фаро гирифтани илму дониш ҳамчун омили раҳоӣ аз нодониву ҷаҳолат ва расидан ба рушду тараққиёт ҳидоят кардаанд.
Ҷавоне, ки соҳиби донишу маърифат ва касбу ҳунар аст, ҳеҷ гоҳ ба роҳи хато намеравад, хору зор намешавад, дар ҳар ҷое, ки бошад, ҷойи кор меёбад ва зиндагии бобаракат мебинад, зеро дунёи маънавии ӯро ақлу хирад, донишу маърифат ва саъю талош пурбор гардонидааст.
Бунёди ҷомеаи солиму рушдёфта маҳз тавассути ташаккул додани илму маорифи пешрафта, ба роҳ мондани таълиму тарбияи мақсадноки ба арзишҳои миллӣ асосёфта, баланд бардоштани сатҳи касбияти омӯзгорон, муҳайё кардани шароити муосири таълим дар муассисаҳои таълимии ҳамаи зинаҳои таҳсилот, яъне бо асбобу таҷҳизоти замонавӣ таъмин намудани онҳо ва албатта, заҳмати содиқонаи аҳли маориф ва ҳамкориву дастгирии падару модарон имкон дошта метавонад.”
Пас аз анҷоми суханронии Асосгузори сулҳу ваҳдати миллӣ-Пешвои миллат Президенти Ҷумҳурии Тоҷикистон муҳтарам Эмомалӣ Раҳмон ректори Донишкада, профессор -Ғанизода Ҷамшед Шуҷоат ва муовини вазири фарҳанги Ҷумҳурии Тоҷикистон- Шарифзода Манучеҳр Муртазо суханронӣ намуда, ҳайати профессорону омӯзгорон ва донишҷӯёну магистрантони Донишкадаро бо Рӯзи дониш ва оғози соли нави таҳсил табрик намуда, барояшон дар соли нави таҳсил муваффақияту комёбӣ ва пешравиҳои назаррасро дар самти корҳои илмиву эҷодӣ ва омода намудани мутахассисони баландпояи ҷавобгӯ ба бозори имрӯзаи меҳнатро таманно намуданд.
