Модарону бонувони азиз!
Ҳамасола Рӯзи Модар дар лаҳзаҳои нахустини бедоршавии табиат бо накҳату нафосати баҳорӣ ва дар арафаи Наврӯзи байналмилалӣ таҷлил мегардад, ки ин аз бузургии Зан-Модар, нақш ва қадру манзалати ӯ дар ҳаёти инсоният, гувоҳӣ медиҳад. Иди мазкур дар тамоми мамолики дунё чун рамзи дифоъ аз ҳуқуқу ӯҳдадориҳои занон пазируфта шуда, онро бо шукӯҳу шаҳоматихоса ҷашн мегиранд, зеро модар ягона мавҷудест, ки инсон меофарад, ба ӯ ҳаёт мебахшад, ӯро дар оғӯши гарму пурмеҳри худ мепарварад, аввалин суханҳо ва гузоштани нахустин қадамҳоро ба тифлаш ёд медиҳад, фарзанди хешро бо ҳазор нияту орзуҳои нек ба воя мерасонад.
Вақте ки вожаи муқаддаси модарро ба забон меорем, пеш аз ҳама, дар назар симои ҷаззобу нуронии шахси бароямон ҳамеша азизу арҷманд, гаронмоятарин мавҷуди рӯйи замин ва сароғози ҳастии насли башар, сарчашмаи мусаффои меҳру муҳаббат, ягона шахси дар пастию баландиҳои рӯзгор барои инсон мунису ғамхор ва дар маҷмуъ, офарандаву идомадиҳандаи зиндагии инсон ҷилвагар мешавад. Зеро, агар хуршед бо анвори хеш ҷаҳонро файзу рӯшноӣ ва хуррамӣ бахшад, пас, меҳру муҳаббат ва раҳму шафқати зан – модар нури зиндагии инсон, сарчашмаи саршори рӯзгор ва ободию осудагии ҳар хонавода маҳсуб меёбад.
Дар ҷомеаи имрӯзаи Тоҷикистони соҳибистиқлоли мо занон дар баробари мардон барои пешрафти тамоми соҳаҳои ҳаёти ҷомеа, хусусан соҳаи маориф ба фаъолияти пурсамар машғуланд ва барои таҳкими дастовардҳои Истиқлолу бунёди давлатдории миллӣ саҳми сазовор мегузоранд.
Дар тамоми давраҳои таърихии миллатамон қадру қимати зани тоҷик ҳамеша баланд буд ва нақши онҳо дар инкишофи тамаддуни фарҳанги миллӣ басо бузург аст. Бо ташаббус ва ибтикори бевоситаи Пешвои миллат муҳтарам Эмомалӣ Раҳмон як қатор тадбирҳои мушаххас, аз ҷумла қабул кардани барномаи давлатӣ оид ба ҷо ба ҷо гузории кадрҳо аз ҳисоби занон, бунёди хобгоҳҳо барои донишҷӯдухтарон, ҷудо намудани гранти Президентӣ барои институтҳои ҷомеаи шаҳрвандӣ, қабули духтарон тибқи квотаи Президентӣ ба муассисаҳои олии касбӣ амалӣ шуда истодаанд.
Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар суханрониҳои худ роҷеъ ба бузургдошти модарони азизамон пайваста ҳарф зада, ба мақому манзалати онҳо ҳамеша арҷ мегузоранд. Ба таъкиди Пешвои миллат муҳтарам Эмомалӣ Раҳмон “… дар таърихи тамаддуни башар шоир, нависанда ё файласуферо пайдо кардан амри маҳол аст, ки дар васфи зан ва иззату эҳтироми ӯ сухане нагуфта бошад, зеро зан – модар сарчашмаи ҷовидонии ҳаёт ва манбаи эҷод аст. Ниёгони соҳибхиради мо барои наслҳои инсоният доир ба эҳтирому бузургдошти зан – модар суханҳои пурҳикмат ва пурарзиш ба ёдгор мондаанд”.
Ҳукумати мамлакат бо дарназардошти нақши муассири занону бонувон дар ҳаёти сиёсиву иқтисодӣ ва иҷтимоиву фарҳангии кишвар, таъмини ҳуқуқу манфиатҳои занону модаронро яке аз самтҳои муҳимтарини сиёсати худ қарор додааст. Дар замони соҳибистиқлолӣ, барои баланд бардоштани маърифати ҳуқуқии занону бонувон, беш аз 60 санади меъёрии ҳуқуқӣ қабул карда шуд, ки амалисозии онҳо боиси бамаротиб беҳтар шудани вазъи иҷтимоии занону духтарон гардид.
Илова бар ин, тибқи супоришҳои Пешвои миллат муҳтарам Эмомалӣ Раҳмонду ҳуҷҷати муҳим – Стратегияи миллии фаъолгардонии нақши занон дар Ҷумҳурии Тоҷикистон барои солҳои2021 –2030 ва Барномаи давлатии тарбия, интихоб ва ҷобаҷогузории кадрҳои роҳбарикунанда аз ҳисоби занону духтарони болаёқат барои солҳои 2023 – 2030 қабул карда шуд.
Имрӯз фаъолияти занон дар пешбурди соҳаи фарҳанг, аз ҷумла рушди санъати тасвирӣ низ шоиста арзёбӣ мешавад, аз ҷумла дар пешрафти фаъолияти Донишкадаи давлатии санъати тасвирӣ ва дизайни Тоҷикистон занон мақоми густурда доранд, ки аз фаъолияти самараноки онҳо дар низоми илму маориф ва фарҳангу санъати мамлакат гувоҳӣ медиҳад.
Бо ибрози беҳтарин ниятҳои нек, ҳамаи Шумо, модарони меҳрубон ва бонувони арҷмандро ба ифтихори ҷашни фархундаи Рӯзи Модар самимона табрик гуфта, ба ҳар яки Шумо, пеш аз ҳама, саломатӣ, хушбахтӣ ва тамоми хушиҳои зиндагиро орзу менамоям. Бигузор шодиву хушбахтӣ дар хар як хонадони зан-модари тоҷик ҳамеша шукуфон бошад!
