Устодон, кормандон ва донишҷӯёни азиз!
Кишварамон боз дар арафаи Наврӯзи байналмилалӣ қарор дорад. Аз ин рӯ, ҳамаи Шумо ва дар симои Шумо тамоми сокинони шарафманди мамлакатро бо ин иди хуҷастапай табрику таҳният мегӯям.
Наврӯз дар партави ғояҳои зиндагиафрӯз ва нусратбахши Истиқлолияти давлатиамон ба марҳалаи нави эҳёи худ расида, туфайли сиёсати хирадмандонаи Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон мақоми хоса пайдо намуд ва аз ҷашни мардумӣ то сатҳи байналмилалӣ эътироф гардид.
Дар партави сиёсати халқпарварона ва ободкоронаи Пешвои муаззами миллат имрӯз сокинони меҳнатқарини кишвари азизамон дар ҳошияи ин ҷашни табиат ба раванди корҳои созандагиву бунёдкорона вусъати тоза бахшида, баҳри шукуфоиву сарсабзӣ ва ободии Ватани маҳбубамон фидокорона меҳнат карда истодаанд.
Наврӯзи оламафрӯз имсол бо ҳама рангорангиву рӯҳи зиндагисозаш ва пайку муждаҳои баҳорӣ фаро расида, чун сароғози ҳаёти нав ва амалӣ шудани ормонҳои наҷиб ҳар яки моро барои расидан ба ҳадафу ниятҳои некамон ҳидоят менамояд.
Бигзор, Наврӯзи имсола бо тамоми шукӯҳу шавкаташ ба мардуми Ватани азизамон баҳори нек, амалишавии ниятҳо, ҳосили фаровон, илму дониши ғанӣ, зиракиву бедории сиёсӣ ва муроди дилу комгорӣ эҳдо намояд.
Ҳар рӯзатон Наврӯз бод!
Наврӯзатон фирӯз бод!
