Дирӯз таҳти роҳбарии муовини вазири фарҳанги Ҷумҳурии Тоҷикистон- Сафарзода Давлат Шариф, муовини раиси Иттифоқи композиторони Тоҷикистон Ҳомидов Сангалӣ, корманди Донишкадаи давлатии санъати тасвирӣ ва дизайни Тоҷикистон – Фирӯз Ҳаитов ва сардори Раёсати фарҳанги вилояти Хатлон- Мустафои Ватан дар Кохи фарҳанг ва иттилоотии шаҳри Бохтар ба номи Аловуддин Абдуллозода бо муовинони раисони шаҳру ноҳияҳо, кормандон ва масъулони раёсат, шуъбаҳо, бахшҳои фарҳанг ва маорифи шаҳру ноҳияҳои минтақаи Бохтари вилояти Хатлон ҷиҳати дар сатҳи баланд баргузор намудани Озмуни ҷумхуриявии “ТОҶИКИСТОН- ВАТАНИ АЗИЗИ МАН” семинари омӯзишӣ гузаронида шуд.
Зимни суханронӣ дар семинари мазкур бо мақсади шарҳи муфассали талаботҳои озмун ва муаррифии намунаи корҳои эҷодӣ дар номинатсияҳои санъати тасвирӣ ва дизайн, ҳамзамон жанрҳои он, ки барои довталабон ва иштирокчиёни сину соли мухталиф муқаррар гардидааст, дар доираи Низомнома, Талабот ва тартиби иштирок дар номинатсияҳои санъати тасвирӣ ва дизайн, ки ҳамчун замима ба Дастурамали тавсиявии Озмуни ҷумҳуриявии Тоҷикистон-Ватани азизи ман тасдиқ шудааст, корҳои фаҳмондадиҳӣ бурда шуд.
Хотирнишон намудан ба мавридаст, ки
тибқи Амри Президенти Ҷумҳурии Тоҷикистон аз 1 январи соли 2024 №АП-479 дар бораи баргузор кардани Озмуни ҷумҳуриявии «ТОҶИКИСТОН- ВАТАНИ АЗИЗИ МАН» дар соли 2024 ба тасвиб расида буд, хушбахтона соли дуюм аст, ки довталабон аз рӯйи номинатсияҳои санъати тасвирӣ ва дизайн дар озмуни мазкур ширкат меварзанд. Иқдоми мазкур натанҳо барои омӯзгорон ва донишҷӯёни Донишкадаи давлатии санъати тасвирӣ ва дизайни Тоҷикистон, балки барои тамоми довталабони қобилияти баланди эҷодӣ дошта, чеҳраҳои зебоиофар дар соҳаи санъати тасвирӣ ва дизайн, ҳамзамон баҳри кашфи беҳтарин чеҳраҳои соҳибистеъдод ва соҳибзавқу хушсалиқа дар соҳаи мазкур метавонад заминаи мусоидро фароҳам оварад.
Бояд қайд намуд, ки барои иштироки фаъолонаи донишҷӯён дар озмуни мазкур ҳайати профессорону омӯзгорони Донишкада барои дар амал тадбиқ намудани ташаббусҳои Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон баҳри рушди соҳаи санъати тасвирӣ ва дизайн, эҳё ва рушди ҳунарҳои мардумӣ, тарбияи дурусти наврасону ҷавонон дар рӯҳияи худогоҳиву хештаншиносӣ, ҳифзи арзишҳои милливу фарҳангӣ ва ба камол расонидани мутахассисони баландихтисос дар самтҳои мазкур камари ҳиммат баста, барои ҷалби бештари довталабон саъю талош менамоянд.
шаҳри Бохтар
марти соли 2024
