Ё чанд андешаи шогирдвор дар бораи ҳаёту фаъолияти устоди соҳибхираду соҳибмактаб Субҳон Усмонов
Мумтозу намуна шудан барои як сол аст.
Мондагор шудан барои як умр.
Сано бар омӯзгоре, ки ҳар сол намуна асту як умр мондагор!
Усмонов Субҳон- Аълочии маориф ва илми Тоҷикистон, номзади илмҳои педагогӣ, дотсент, мудири кафедраи забонҳо ва фанҳои гуманитарии Донишкадаи давлатии санъати тасвирӣ ва дизайни Тоҷикистон мебошанд. Мавсуф зодаи ноҳияи Восеъ буда, овони кӯдаки ва наврасии хешро дар ноҳияи мазкур сипари намудаанд. Устод хатмкардаи факултетҳои педагогика ва географияи Донишгоҳи омӯзгории ба номи С.Айнӣ буда, хизмати ҳарбиро дар флоти ҳарбӣ-баҳрии ш.Владивастоки кишвари Приморэи ҶШС Россия сарбаландона адо намудаанд. Устод фаъолияти кории худро аз омӯзгори дар мактаб оғоз намуда, сипас дар вазифаҳои роҳбарикунандаи ҳокимияти маҳаллӣ ва директори мактаб-интернати ноҳияи Восеъ кору фаъолият намудаанд. Солҳои 2006-2009 унвонҷӯи Академияи рушди маорифи Ҷумҳурии Тоҷикистон буда соли 2010 рисолаи номзадии худро дифо намудаанд. Ҳамзамон солҳои 2005-2011 дар Коллеҷи техникии Донишгоҳи техникии ба номи академик М.С.Осимӣ вазифаҳои муовини директор, декани факултети “Энергетика ва телекоммуникатсия”-ро ба ӯҳда доштаанд. Соли 2011 директори Омӯзишгоҳи касбии техникии 9/и собиқ ш. Қурғонтеппа ҳозира ш.Бохтар ва аз охири соли 2011 то соли 2014 дар Донишкадаи соҳибкорӣ ва хизмат дар вазифаҳои директори маркази туристӣ, сардори шуъбаи ташкилӣ ва дотсенти кафедраи туризм кору фаъолият намудаанд. Устод аз соли 2015 инҷониб дар Донишкадаи давлатии санъати тасвирӣ ва дизайни Тоҷикистон ба ҳайси мудири кафедраи забонҳо ва фанҳои гуманитарӣ, декани “факултети Дизайн”, айниҳол бошанд, ба ҳайси мудирии кафедраи қаблан зикр гардида кору фаъолият намуда истодаанд. Лозим ба ёдоварист, ки Устод дар давоми фаъолияти корияшон зиёда аз 85 мақолаҳои илмӣ, илмӣ-методӣ, илмӣ-оммавӣ, 7 дастури таълимӣ, 4 монография бо номҳои
-Ҳукми тақдир- китоби ёддошт, тарбия ва ахлоқ;
-Мавқеи географияи Тоҷикистон дар тарбия, дастури тарбиявӣ;
-Тарбияи экологӣ;
-Туризмӣ экологӣ ва Диёри Балҷувон-ро бахшида ба “Солҳои 2019-2021 солҳои рушди деҳот сайёҳӣ ва ҳунарҳои мардумӣ”, рӯи чоп овардаанд.
Бояд қайд намуд, ки Устод воқеъан инсони наҷиб, шахсияти комил, инсони заҳматпешша, роҳбари хирадманд, серталош, ва сахтгир ба ҳисоб меравад. Маҳз заҳмату талошҳои пайваста, хизмати софдилонаву содиқона ва ҳисси баланди масъулиятшиносии Устод буд, ки мавсуф барои хизматҳояшон бо нишони сарисинагии “Аълочии маориф ва илми Ҷумҳурии Тоҷикистон”, медали “Хизмати шоиста”, Ифтихорномаҳо ва Сипосномаҳои бешумор аз ҷониби Вазорати маориф ва илми ҶТ, Вазорати фарҳанги ҶТ, Ҳизби халқии демократии Тоҷикистон, Маҷлиси намояндагони МОҶТ ва Раёсатҳои донишгоҳу донишкадаҳои мухталиф сарфароз гардонида шудаанд.
Ҳамкори бо Устод ва ҳамчун шогирд истифода намудан аз мактаби ғании кору фаъолият дар самтҳо, соҳаҳо ва зинаҳои мухталиф ва таҷрибаи бузурги ҳаёту зиндагӣ барои расидан ба ояндаи дурахшон ба Мо шогирдони ҷавон умеду эътимоди қавӣ мебахшад. Устод дар ҳама самтҳо, паҳлуҳои зиндагӣ ва дар кору фаъолият машваратчии сатҳи баланд ва роҳнамои хуби мо шогирдонанд.
Банда аз номи худ ва аз номи кормандони шуъбаи илм, инноватсия ва корҳои эҷодии донишкада устодро аз самими қалб бо ҷашни мавлудашон табрику муборакбод мегӯям. Аз даргоҳи Худованд ба устод саломатӣ, умри дароз, осудагии рӯзгор, хушбахтӣ, дар кору фаъолият ва амалишавии нақшаҳои бузурги ҳаётиашон мувафаққиятҳои беназирро тамонно дорам.
Ҳаитов Фирӯз Мирзомуродович, мудири
бахши магистратураи Донишкадаи
давлатии санъати тасвирӣ ва дизайни Тоҷикистон
