Қонуни мазкур бо тақозои рушди ҷомеа анъана ва ҷашну маросимҳоро танзим намуда, ба ҳифзи арзишҳои асили фарҳанги миллӣ ва эҳтиром ба суннатҳои мардумӣ барои баланд бардоштани сатҳи иҷтимоию иқтисодии ҳаёти шаҳрвандони Ҷумҳурии Тоҷикистон равона гардидааст.
Қонуни ҶТ «Дар бораи танзими анъана ва ҷашну маросимҳо дар Ҷумҳурии Тоҷикистон» самараи истиқлоият буда, мақсади Қонуни мазкур аз ҳимояи манфиатҳои иҷтимоии мардуми Тоҷикистон, мусоидат барои паст кардани сатҳи камбизоатӣ ва гирифтани пеши роҳи зиёдаравиҳо, хароҷоти зиёдатӣ, ки ба манфиатҳои иқтисодӣ ва фазои маънавии ҳаёти шаҳрвандон зарари ҷиддӣ ворид менамоянд, қабул гардидааст. Имрӯз бо қаноатмандӣ метавон гуфт, ки қабули қонун ҳамчун яке аз иқдомоти муҳимтарин дар самти ҳифзи анъанаҳои мардумӣ боиси ҳалли бисёр мушкилоти ҳаётан муҳимми аҳли ҷомеа гардида, ҷашну маъракаҳо ва расму ойинҳоро дар кишвар ба низом даровард.
Дар Ҷумҳурии Тоҷикистон ҷашнҳои Истиқлолияти давлатӣ, Конститутсияи Ҷумҳурии Тоҷикистон, Ваҳдати миллӣ, Наврўз, Сада, Тиргнон, Меҳргон, идҳои Рамазон, Қурбон ва дигар идҳо тибқи қонунгузории Ҷумҳурии Тоҷикистон баргузор мегарданд, ки ин нишонаи Истиқлолияти миллӣ буда, барои мардуми кишвари азизамон Тоҷикистон боиси хурсандӣ ва сарфарозист.
Шаҳрвандони кишвар бояд ҳамеша дар ёд дошта бошанд, ки дар шароити пуртазоду пурҳаводиси имрӯза ҳимояи неъмати барои ҳар як инсони баномус бузургтарину муқаддас – истиқлолу озодӣ кори саҳлу осон нест. Ҳифзи ин гавҳари бебаҳо аз ҳар як шаҳрванди Ҷумҳурии Тоҷикистон саъю талош ва кӯшишу ғайрати шабонарӯзӣ, нангу номуси миллӣ, заҳмати содиқонаву фидокорона ва муҳимтар аз ҳама, иттиҳоду сарҷамъиро талаб дорад.
Ҳайати омӯзгорон ва кормандони Донишкадаи давлатии санъати тасвирӣ ва дизайни Тоҷикистон баҳри татбтқи Қонунҳои Ҷумҳурии Тоҷикистон, алалхусус Қонуни ҶТ «Дар бораи танзими анъана ва ҷашну маросимҳо дар Ҷумҳурии Тоҷикистон» ва риояи он саъю талош менамоянд. Мазмун ва моҳияти Қонуни мазкурро дар раванди соатҳои таълимию тарбиявӣ ба донишҷён меомӯзанд ва корҳои фаҳмондадиҳӣ мегузаронанд.
Дар шароити ниҳоят мураккабу ҳассоси ҷаҳони муосир зираку ҳушёр будан, роҳ надодан ба амалҳои зиёдаравию исрофкорӣ ва риояи маъёрҳои Қонун камоли хирадмандист.
Субҳон Усмонов, устоди Донишкадаи давлатии санъати тасвирӣ ва дизайни Тоҷикистон
