Дар Донишкадаи давлатии санъати тасвирӣ ва дизайни Тоҷикистон бахшида ба Рӯзи муаллим ва Рӯзи забони давлатӣ таҳти унвони “Омӯзгорон – посдорони забони миллат” бо иштироки васеи омӯзгорон ҷамъомади калони тантанавӣ барпо гардид.
Ҷамъомадро ректори донишкада, номзади илмҳои меъморӣ Ғанизода Ҷамшед Шуҷоат кушода, омӯзгоронро ба муносибати фарорасиии Рӯзи муаллимон ва ҳам Рӯзи забони давлатӣ самимона табрик гуфт.
Сипас, устодони донишкада – дотсенти кафедраи забонҳо ва фанҳои гуманитарӣ, котиби Шӯрои олимон Саиднуриддин Акобиров, сардори шӯъбаи тарбия Муҳаммадшариф Эсанов, омӯзгори кафедраи графика ва миниётураи ба номи Фаррух Хоҷаев Парвина Ҷалолова, донишҷӯёни факултетҳои санъати тасвирӣ Маҳваш Садриддинова, дизайн Алмира Тутишоева ва Мадина Бобохонова баромад карда, аҳли ҷамъомадро ба Рӯзи Муаллимон ва ҳам Рӯзи забони давлатӣ муборакбод гуфтанд.
Қайд карда шуд, ки муаллимон дар иҷрои рисолати пуршарафи хеш, дар амри соҳибмаърифату соҳибкасб гардонидан, дар руҳияи худшиносии миллӣ, ватандӯстию ватанпарастӣ ва забондонӣ тарбия намуда ба камол расонидани насли наврас беҳамтову беназиранд. Забонро аввалан модар ба мо омӯзонда, пас муаллим такмил медиҳад. Мақому манзалати муаллим дар ташаккули маърифату фарҳанги халқияту миллатҳо ҳамеша бузург арзёбӣ гардида, ӯро тарбиягари инсон, чароғи раҳнамо ба сӯи фардои дурахшон, таконбахши рушди ҷомеа ва неруи ақлонӣ номидаанд. Имрӯз ҳам ин тавсифот побарҷо буда, ҳамеша аз нақши тарбиягарии муаллим мегӯянду ба бузургиаш арҷ мегузоранд.
Дар Ҷумҳурии Тоҷикистон таҳти роҳбарии маорифпарваронаи Асосгузори сулҳу ваҳдати миллӣ-Пешвои миллат , Президенти Ҷумҳурии Тоҷикистон муҳтарам Эмомалӣ Раҳмон ба омӯзгорон таваҷҷуҳи махсус зоҳир гардида, барои фаъолияти судманду мондагори онҳо дар ҷомеа ҳама шароитҳои зарурӣ фароҳам оварда шудааст…
Дар анҷоми ҷамъомад ректори донишкада дар ҳолати тантанавӣ ба як гуруҳ омӯзгороне, ки аз курсҳои такмили ихтисос гузаштаанд, сертификат супурд.
