Дар толори намоишии Донишкадаи давлатии санъати тасвирӣ ва дизайни Тоҷикистон ифтитоҳи намоиши асарҳои эҷодии рассоми ҷавон Муҳаммад Ҳикматзода таҳти унвони «Накҳати баҳор» баргузор гардид.
Дар маросими ифтитоҳ Ҷӯрахонзода Сироҷиддин Шамсулло, ректори муассиса, Наргис Ҳамидова, раиси Иттифоқи рассомони Тоҷикистон, наққоши маъруф Муҳаммадкарим Рақибов, устодону омӯзгорон ва донишҷӯёни Донишкада иштирок намуданд.
Нахуст, ректори Донишкада суханронӣ намуда, роҷеъ ба таърихи пайдоиши ин навъи санъат, моҳият ва муҳтавои асарҳои эҷодии наққоши ҷавон ва баргузории чунин намоишҳо дар муассиса ибрози назар кард. Ба таъкиди мавсуф, кундал ҳамчун як навъи санъати ороиши амалӣ дар санъати меъморӣ ва наққошии мардуми тоҷик мақоми хоса дорад.
“Асоси ин асари наққоширо тасвироти набототӣ ташкил дода, дар ин ҳунар ҳоло истифодаи ҳама гуна сужет – инсон, парандагон ва ҳайвонот дар шакли миниатурӣ дида мешавад. Намунаҳои ин усули санъат бори аввал дар лавҳаҳои кошикории биноҳои асри XIV дар ёдгориҳои меъмории шаҳрҳои Самарқанду Бухоро, Шаҳрисабз ва дигар манотиқи Осиёи Марказӣ истифода гардида, то ба имрӯз маҳфуз дошта шудаанд”, – гуфт ректор.
Қайд гардид, ки Муҳаммадҷон Ҳикматзода 2-юми феврали соли 2000-ум таваллуд шуда, соли 2020 Коллеҷи ҷумҳуриявии рассомии ба номи Мирзораҳмат Олимовро бо ихтисоси наққош хатм кардааст. Айни замон дар зинаи магистратураи Донишкадаи давлатии санъати тасвирӣ ва дизайни Тоҷикистон таҳсил дорад. Ӯ соли 2019 барандаи Ҷоизаи Кумитаи кор бо ҷавонон ва варзиши назди Ҳукумати Ҷумҳурии Тоҷикистон барои дастовардҳо дар соҳаи санъати тасвирӣ шуда, ғолиби Шохҷоизаи Озмуни ҷумҳуриявии «Тоҷикистон – Ватани азизи ман» дар номинатсияи «Санъати тасвирӣ» аст. Асарҳояш дорои мазмуни баланди эҷодию ғоявӣ мебошанд.
Дар идомаи чорабинӣ Наргис Ҳамидова суханронӣ намуда, роҷеъ ба саҳми наққошон дар рушди санъати тасвирӣ маълумот дод. Ба зикри ӯ, наққошӣ ҳунари офаридани нақш, маҳсулоти эҷодии санъаткорони халқӣ ва касбӣ буда, яке аз навъҳои бостонии санъати ороишӣ ва амалии мардуми тоҷик ба ҳисоб рафта, бо нафосати хоси шарқиёна ва таърихи куҳани худ аз дигар навъи санъат фарқ мекунад.
«Барои аз бар кардани ҳунари наққошӣ шахс бояд тамоми нозукиҳои онро омӯхта, ба ин касб дил бандад. Нақши миллӣ ва анвои он тариқи наққошӣ, умуман, ба василаи санъати ороиши амалӣ, аз мавзӯъҳои хеле муҳим маҳсуб ёфта, замони ҷаҳонишавии муосир ва ба ҳам омадани тамаддунҳо эҳёву зинда доштани ҳунарҳоеро тақозо дорад, ки ифшогари асолати миллианд. Аз ин рӯ, талошу ташаббуси Муҳаммадҷон Ҳикматзода ҷиҳати баргузории ин намоиш ва рӯ оварданаш ба санъати наққошӣ боиси таҳсин аст”, – гуфт раиси Иттифоқи рассомони Тоҷикистон.
Сипас, наққоши маъруф Муҳаммадкарим Рақибов, ки устоди Муҳаммадҷон аст, роҷеъ ба асарҳои ӯ ибрози назар намуд. Ӯ гуфт, Муҳаммадҷон Ҳикматзода ҳоло идомадиҳандаи мактаби кундалнигорӣ буда, иштирокчии дарсҳои маҳорат аз ҷониби Идораи рушд ва ҳамкории Туркия бо Тоҷикистон дар шаҳри Душанбе, намоиши асарҳои эҷодӣ таҳти унвони «Пайванди наслҳо» ва озмуни телевизионии “Армуғон” аз ҷониби телевизиони “Сайёҳӣ ва ҳунарҳои мардумӣ” мебошад. Ба ғайр аз ин, ӯ барандаи медали нуқраи 16-умин Бозиҳои Делфии ҷавонони кишварҳои узви ИДМ буда, яке аз наққошони самти кундал аст.
Дар хотима худи Муҳаммадҷон Ҳикматзода суханронӣ карда, ба Раёсати Донишкада ва устодонаш ҷиҳати дастгирии ташаббуси ӯ ва баргузории намоиши эҷодиаш изҳори миннатдорӣ намуд.
Ёдовар мешавем, ки намоиши мазкур аз 17 апрел то 10 майи соли равон дар толори намоишии Донишкадаи давлатии санъати тасвирӣ ва дизайни Тоҷикистон бо суроғаи шаҳри Душанбе, кӯчаи Айнӣ 31 (рӯбарӯи Маркази савдои “Садбарг”) идома мекунад.
