Модар қиматтарин ганҷинаи рӯи дунё, сарчашмаи муҳабатти беканор, чашмаи мусаффо ва маҳзани ганҷи фарзанд, ҳимматбаландтарин шахси башарият аст. Маҳз меҳри бепоён ва навозиши гарми модар моро ба оламу одам ошно мекунад. Заҳмати шабонарӯзӣ, бедорхобӣ пурбардории ӯ танҳо ба худаш хос буда, касро ба ҳайрат меорад.
Модар офарандаи ҳаёт, созандаи сулҳ ва парварандаи тамоми мутахассисони одамият мебошад. Ӯ фақат сулҳ мехоҳад фарзанди одамро дар рӯҳияи ватандӯстиву сулҳофарин тарбия менамояд. Модар ҳаст, ки мо ҳастему ҳаёт ҳаст. Кист он касе, ки аллаи модарро нашунида бошад, аз шири сафеди ӯ баҳра наёфта бошад. Модар дар ҳама ҳолат чӣ ҳозиру ғоиб пайваста дар ёди фарзанд аст. Оромиву сиҳатӣ ва хушгуфтории фарзандро дида меболад. Аҷаб дунёи рангину зебо дорад, модар…
Модар мисли замин танҳо ва яктост. Инсон баъд аз раҳо гаштан аз оғӯши гарми модар қиммати ӯро дарк мекунад. Зеро мисли канори модар биҳиштосо макони дигаре нест. Барҳақ шоир фармудааст:
Тифлию домони модар хуш биҳиште будааст,
Чун ба пои худ равон гаштем, саргардон шудем.
Давлати фазанд модар аст. Симои ин шахсияти нотакрор дар адабиёт мақоми хоса дорад. Шоирону адибони олам симои воқеии ӯро бо сухан нишон дода, номашро то Моҳ баровардаанду рассомони маъруф тарҳи рӯяшро тасвир кардаанд. Модар ба чунин қадрдонӣ сазовор аст.
Дар замони Истиқлоли давлати зери сиёсати созандаи Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон мавқеи зан дар ҷомеаи баланд бардошта шуд. Ҳамин аст, ки имрӯз занону модарони тоҷик дар ҷумҳурӣ ва ҳатто берун аз он дар вазифаҳои гуногун дар баробари мардон фаъолияти пурсамар доранд.
Пешвои миллат муҳтарам Эмомалӣ Раҳмон барҳақ таъкид кардаанд, ки “Бо муҳаббату самимият ва дӯстдориву қадршиносӣ таҷлил намудани Рӯзи модар гувоҳи он аст, ки давлату Ҳукумат ва ҷомеаи кишвари мо қадру манзалати Зан-Модарро гиромӣ ва азиз медоранд. Бо дарназардошти он, ки занону бонувон ва духтарони мо дар ҳаёти сиёсиву иқтисодӣ ва иҷтимоиву фарҳангии кишвар нақши бисёр арзишманду муассир доранд, давлат ва Ҳукумати мамлакат масъалаи таъмин намудани ҳуқуқу манфиатҳои онҳоро дар маркази сиёсати худ қарор додааст”.
Басо рамзист, ки санаи мубораи Рӯзи модар ба оғози фасли зебои табиат ва баҳори фархундапай рост меояд. Бо шарофати бузургиву шаҳомате, ки модар дар ҳаёти ҳар яки мо нақши муассир дорад, дар кишвар сар аз даврони Истиқлоли давлатӣ бо иқдоми хирадмандонаи Пешвои миллат муҳтарам Эмомалӣ Раҳмон санаи 8-уми март ҳамчун Рӯзи Модар бо шукуҳу шаҳомати хоса таҷлил карда мешавад.
Дар кишвари соҳибистиқлоли мо дар партави сиёсати хирадмандонаи Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон имрӯз занону модарон дар ҳама зинаҳои бахшу соҳаҳои хоҷагии халқ кору фаъолияти созанда намуда истодаанд.
САФАРОВА Зарнигор Аламовна,
муовини декан оид ба тарбия ва корҳои эҷодии факултети санъати тасвирии
Донишкадаи давлатии санъати тасвирӣ ва дизайни Тоҷикистон
