Дар факултети санъати тасвирии Донишкадаи давлатии санъати тасвирӣ ва дизайни Тоҷикистон маҷлиси падару модарон гузаронида шуд.
Дар маҷлис Муҳаммад Каримов, муовини декан оид ба таълим ва илм, Зарнигор Сафарова, муовини декан оид ба тарбия ва корҳои эҷодӣ, Бека Ёғибекова, мудири кафедраи санъатшиносӣ, Фаррух Атоев, мудири кафедраи графика ва миниатюраи ба номи Фаррух Хоҷаев ва волидони донишҷӯёни курсҳои дуюми факултет иштирок намуданд.
Маҷлисро Муҳаммад Каримов, муовини декан оид ба таълим ва илм ифтитоҳ намуда, доир ба назорати иштироки донишҷӯён дар раванди дарс, риояи сарулибоси тавсиявӣ дар муассиса, роҳҳои баланд бардоштани тарбияи ватандӯстии ҷавонон, омилҳои пешгирии шомилшавии ҷавонон ба гурӯҳҳои ифротӣ ва дигар масъалаҳои мубрам суханронӣ намуд.
Иброз гардид, ки вазифаи асосии кори тарбиявӣ бо донишҷӯён бояд бо фароҳам овардани шароит барои ошкор намудан ва рушди қобилиятҳои эҷодӣ, худмуайянкунии шаҳрвандӣ ва худшиносӣ, ҳамоҳангсозии талаботи донишҷӯён ба рушди зеҳнӣ, ахлоқӣ, фарҳангӣ ва ҷисмонии онҳо дониста шавад. Дар ин радиф раванди таълим ва тарбияи донишҷӯро дар муассисаҳои олии касбӣ дар самтҳои ташаккули фарҳанги баланди ахлоқӣ дар байни донишҷӯён; ташаккули мавқеи фаъоли шаҳрвандӣ ва шуури ватандӯстӣ, фарҳанги ҳуқуқӣ ва сиёсӣ; шаклгирии сифатҳои шахсии барои фаъолияти самараноки касбӣ зарурӣ; дар шаклҳои гуногуни худидоракунии донишҷӯён тарбия намудани малакаҳои идоракунии коллектив; ҳифз ва густариши анъанаҳои таърихию фарҳангӣ бо пайвастагӣ дар таълиму тарбияи донишҷӯ; мустаҳкам намудан ва беҳтар намудани ҳолати ҷисмонӣ, кӯшиш ба тарзи ҳаёти солим, тарбия намудан зидди истифодаи тамокукашӣ, нашъамандӣ, майзадагӣ ва рафтори зиддиҷамъиятӣ амалӣ бояд намуд.
Таъкид карда шуд, ки аз ҷониби волидон барои тарзи ҳаёти солим ва ташаккули шахсият ба тарзи васеъ гузаронидани тадбирҳои махсуси пешгирикунанда, аз ҷумла расонидани кӯмаки психологӣ, сӯҳбатҳо дар бораи зарари тамокукашӣ, истеъмоли машрубот, нашъамандӣ, тарғиби тарзи ҳаёти солим ва монанди ин бо донишҷӯён мувофиқи мақсад мебошад.
“Имрӯз тарбияи ватандӯстӣ яке аз самтҳои асосӣ, вале душвортарини кори тарбия ба ҳисоб меравад, зеро дар ҷомеаи имрӯза ақидаҳои наве, ки бо дигаргунсозии афкори ҷавонон ба миён омадааст, алоқаманданд ва ҳанӯз ба мафкураи ҷавонон ақидаҳои гуногунро тавассути шабакаҳои иҷтимомӣ роҳандозӣ менамоянд”, – гуфт Зарнигор Сафарова, муовини декан оид ба тарбия ва корҳои эҷодӣ.
Ба зикри ӯ, муҳимтарин василаи тарбияи шаҳрвандӣ ва ватандӯстӣ ин омӯзиши таърихи гузаштаи аҷдодони хеш мебошад. Дар ин раванд ҳам устодон ва ҳам волидайнро зарур аст, ки омӯзиши гузаштаи қаҳрамонон ва анъанаҳои пуршарафи миллати худро миёни донишҷӯён боз ҳам васеътар тарғиб намуда, аз таърихи ҷанги шаҳрвандӣ ибрат гирифта, ба санаҳои фаромӯшнашавандаи таърихи миллӣ, суҳбатҳо оид ба бедор намудани эҳтиром ба гузаштаи таърихии мамлакати худ ва ҳисси қарзи шаҳрвандӣ дар назди Ватан, баргузор намоянд.
Дар ҷаласа зикр гардид, ки имрӯз вазифаи таълиму тарбияи донишҷӯ ва ҳадафҳои асосии системаи идоракунии онҳоро метавон дар зерин ба даст овард: дар ниҳоди донишҷӯён ташаккул додани муносибати масъулиятшиносӣ ва эҷодӣ ба таҳсил ва фаъолияти ҷамъиятӣ; дар байни аъзои коллектив ташаккул додани мавқеи фаъолонаи ҳаётӣ ва маҳорати идоракунии корҳои ҷамъиятӣ дар асоси мустақилият дар ҳалли масъалаҳои ҳаёти донишҷӯӣ; эҳтироми қонунҳои амалкунандаи Ҷумҳурии Тоҷикистон, риояи қоидаҳои хобгоҳ ва ғайраҳо, зеро тарбияи донишҷӯён яке аз роҳҳои омода намудани шаҳрвандони фаъол ба ҳаёт дар ҷомеаи муосир буда, он аҳамияти бузурги иҷтимоӣ дошта, ба ташаккули шахсият, арзишҳои ҷамъият ва пойдории давлат мусоидат мекунад.
