(Бахшида ба Рӯзи Президент)
Ҷумҳурии Тоҷикистон дар солҳои соҳибистиқлолии худ дар бисёр самту соҳаҳо ҷиҳати тараққиёти иқтисодиёту иҷтимоиёт, баланд гардидани сатҳи зиндагии сокинони мамлакат, рушду нумӯи ҳунарҳои мардумӣ ва муаррифии он ба ҷаҳониён ба дастовардҳои бузургу беназире ноил гардид, ки ҳамаи он натиҷаи ташаббусҳои Асосгузори сӯлҳу ваҳдати миллӣ, Пешвои миллат Президенти Ҷумҳурии Тоҷикистон муҳтарам Эмомалӣ Раҳмон аст. Хизматҳои беназири Пешвои муаззами миллат барои кишвар ва мардуми худ, хусусан дар эҳё намудани ҳунарҳои мардумӣ ва роҳнамоӣ ба ҷавонон, бесобиқаву беназиранд.
Тайи солҳои охир бо ташаббуси бевоситаи Президенти мамлакат ва бо имзои ӯ чандин санади меъёрӣ- ҳуқуқӣ аз қабили фармонҳо, амрҳо, қарорҳои Ҳукумати Ҷумҳурии Тоҷикистон ба тасвиб расидаанд. Дар доираи татбиқи амалии онҳо зиёда аз 500 идрорпулии Президентӣ барои хонандагони мактабҳои таҳсилоти миёнаи умумӣ, литсейҳо, гимназияҳо, омӯзишгоҳҳои касбӣ-техникӣ, коллеҷҳо, садҳо идрорпулиҳо барои донишҷӯёни мактабҳои олӣ ва аспирантҳо, ҷоизаи ба номи Исмоили Сомонӣ барои олимон ва муҳақиқони ҷавон, Фонди Президенти Ҷумҳурии Тоҷикистон ҷиҳати таҳсили ҷавонони лаёқатманд дар донишгоҳҳои бонуфузи кишварҳои хориҷӣ, грантҳои Ҳукумати Ҷумҳурии Тоҷикистон барои иттиҳодияҳои ҷамъиятӣ дар соҳаи ватанпарастии ҷавонони Тоҷикистон ҳар кадоме бо маблағи 10000 (даҳ ҳазор) сомонӣ, ташкили 1000 адад квотаҳои Президентӣ барои ҷавондухтарону ҷавонписарони ноҳияҳои дурдасти кӯҳистон барои таҳсил дар мактабҳои олии кишвар, бунёди муассисаҳои таълимии зинаҳои гуногун, марказҳои фарҳангии ҷавонон таъсис дода шудаанд.
Бо ташаббуси Ҳукумати кишвар, алалхусус Асосгузори сулҳу ваҳдати миллӣ – Пешвои миллат, муҳтарам Эмомалӣ Раҳмон барои дубора бедор кардани шавқу завқи китобхонӣ, тақвияти ҳофизаи фарҳангӣ ва баланд бардоштани ҳисси худшиносиву худогоҳии миллӣ озмунҳои ҷумҳуриявии «ФУРЎҒИ СУБҲИ ДОНОӢ КИТОБ АСТ», «Илм-фурӯғи маърифат» ва «ТОҶИКИСТОН – ВАТАНИ АЗИЗИ МАН» баргузор гардида, маблағҳои зиёде ҷудо гардиданд. Аз ҷумла, танҳо барои озмуни ҷумҳуриявии «Фурӯғи субҳи доноӣ китоб аст» дар соли 2023 маблағи 3 895 000 (се миллиону ҳаштсаду наваду панҷ ҳазор) сомонӣ ба таври нақд ҷудо шудааст. Ба хотири боз ҳам беҳтар ба роҳ мондани омӯзиши илмҳои табиатшиносӣ, дақиқ ва риёзӣ, инчунин, барои тавсеаи тафаккури техникии насли наврас солҳои 2020-2040 “Бистсолаи омӯзиш ва рушди фанҳои табиатшиносӣ, дақиқ ва риёзӣ дар соҳаи илму маориф” эълон карда шуд.
Баҳри беҳтар намудани шароити иҷтимоӣ ва зисту зиндагии ҷавонон, паст намудани сатҳи бекорӣ, гирифтани садди роҳи падидаҳои номатлуб дар байни ҷавонон ва вайроншавии оилаҳои ҷавон, танзими мушкилоти демографӣ ва умуман ҳал намудани як қатор масъалаҳои муҳими рӯз Барномаи миллии “Ҷавонони Точикистон” барои солҳои 1999-2000, 2001-2003, 2004-2006, 2007-2009, 2010-2012 , 2019-2021, «Барномаи миллии рушди иҷтимоии ҷавонон дар Ҷумҳурии Тоҷикистон барои солҳои 2022 – 2026» ва «Барномаи давлатии тарбияи ватандӯстӣ ва таҳкими ҳувияти миллии ҷавонони Тоҷикистон барои солҳои 2023– 2027»-қабул гардиданд, ки заминаи мусоидеро барои татбики сиёсати давлати ҷавонон фароҳам овардаанд.
Стратегияи сиёсати давлатии ҷавонон дар Ҷумҳурии Тоҷикистон то соли 2030 аз ҷумлаи хидматҳои беназири Президени муаззами кишвар Эмомалӣ Раҳмон нисбат ба ҷавонони мамлакат маҳсуб мегардад. Ҳамеша ҷавононро ҳамчун нерӯи пешбарандаи ҷамъият, ба омухтани ҳунар ва аз худ кардани касбҳои гуногун таъкид менамояд, зеро эҳёи ҳунарҳои мардумӣ муаррифгари миллат буда, дар тарбияи меҳнатии ҷавонон нақши бориз дорад ва бо ин роҳ фарҳанги миллиамон ҳифз мегардад.
Ҳунар сармояи гаронест, ки онро бо ягон дороӣ, сарват, симу зар иваз кардану харидан номумкин аст. Ҳунар инсонро бузургию шаҳомат бахшида ӯро болидарӯҳ мегардонад. Ҳунар зиндагиро зебоӣ мебахшад. Шахси боҳунар дарёеро мемонад, ки онро ҳар замон обест зулолу ошомиданӣ.
Бо дастгирии Асосгузори сулҳу ваҳдати миллӣ, Пешвои миллат, Президенти кишварамон, мӯҳтарам Эмомалӣ Раҳмон бо қарори Ҳукумати Ҷумҳурии Тоҷикистон соли 2013 таҳти № 144 Донишкадаи давлатии санъати тасвирӣ ва дизайни Тоҷикистон таъсис ёфт. Дар ин даргоҳи ҳунар соли даҳум аст, ки донишҷӯён аз рӯи ихтисосҳои рассомӣ, наққошӣ, ҳайкалтарошӣ, кандакорӣ, заргарӣ ва дизайн таҳсил карда, ҳунар омӯхта истодаанд ва дар оянда онҳо муарифгари ҳунарҳои мардумии миллати тоҷик хоҳанд гашт.
Дар Паёмҳои худ сарвари кишварамон соли 2017-ро соли ҷавонон, соли 2018-ро “ Соли рушди сайёҳӣ ва ҳунарҳои мардумӣ” ва такроран солҳои 2019-2021-ро “Солҳои рушди деҳот, сайёҳӣ ва ҳунарҳои мардумӣ” эълон намуд, ки боиси руҳбаландии аҳли ҷомеа, хусусан ҷавонон гардид. Ҷавонон ҳамчун нерӯи пешбарандаи ҷамъият баҳри аз бар намудан ва эҳё кардани ҳунарҳои мардумӣ, аз ҷумла ҳунари кандакорӣ, наққошӣ, заргарӣ, ҳайклтарошӣ, меъморӣ ва дизайнерӣ сайъу талош варзида истодаанд. Ҳоло дар Донишкадаи давлатии санъати тасвирӣ ва дизайни Тоҷикистон барои аз бар намудани хунарҳои мардумӣ донишҷӯён ҳамчун мутахассиси дорои маълумоти олӣ таҳсил карда истоданд ва ба онҳо устодони собиқадор ва ботаҷриба маҳорати касб меомӯзонд.
Бо боварӣ метавон гуфт, ки онҳо оянда дар намоишҳои сатҳи минтақавию ҷаҳонӣ ҳунари волои миллати тоҷикро муаррифӣ намуда, баҳри рушди ватани азизамон Тоҷикистон, эҳтиром ва арҷ гузоштан ба заҳматҳои созандаи роҳбари муаззам, Пешвои миллат, ҳомию роҳнамои ҷавонон, муҳтарам Эмомалӣ Раҳмон саҳми арзандаи худро мегузоранд.
Субҳон Усмонов, Ҳаитов Ф.М., Каримов М.Л.,
Устодони Донишкадаи давлатии санъати тасвирӣ ва
дизайни Тоҷикистон
