Дар доираи сафари гурӯҳи кории ҷумҳуриявӣ аз ҳисоби масъулини соҳаи фарҳанги мамлакат дар ҳайати Диловар Айдаршозода, сардори шуъбаи идоракунии корҳо ва назорати дастгоҳи марказии Вазорати фарҳанги Ҷумҳурии Тоҷикистон, Ҷурахонзода Сироҷиддин Шамсулло, ректори Донишкадаи давлатии санъати тасвирӣ ва дизайни Тоҷикистон, Фарҳод Мақсудзода, ноиби ректор оид ба таълими Донишкадаи давлатии фарҳанг ва санъати Тоҷикистон ба номи Мирзо Турсунзода, дар маркази Вилояти Мухтори Куҳистони Бадахшон-шаҳри Хоруғ бо иштироки ҳайати гурӯҳи кории ҷумҳуриявӣ, масъулини соҳаи фарҳанги вилоят, аз ҷумла Авзалшо Муслима Аскаршо, муовини раиси вилоят, Гулдасташо Амирхонов, сардори раёсати фарҳанг, муовинони раисони шаҳру ноҳияҳо ва мудирони шуъбаву бахшҳои дахлдори мақомоти иҷроияи маҳалии ҳокимияти давлатии вилоят семинар-машварат баргузор гардид.
Вохӯрии мазкур дар заминаи Амри Президенти Ҷумҳурии Тоҷикистон аз 2 январи соли 2025 таҳти рақами АП-711 бобати дар сатҳи баланд ташкил ва баргузор намудани Озмуни ҷумҳуриявии “Тоҷикистон – Ватани азизи ман” дар асоси фармоиши Вазири фарҳанги Ҷумҳурии Тоҷикистон аз 17 январи соли 2025, №03 оид ба таъсиси гурӯҳи корӣ ва ҳайати мутасаддиҳо баҳри баргузории семинарҳои муштарак дар бораи Низомномаи Озмуни ҷумҳуриявии «Тоҷикистон – Ватани азизи ман» дар вилоятҳо ва шаҳру ноҳияҳои ҷумҳурӣ баргузор гардид.
Дар мулоқот зикр гардид, ки Озмуни ҷумҳуриявии «Тоҷикистон – Ватани азизи ман» таҳти cарпарастии Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон роҳандозӣ шуда, ҳадаф аз баргузории он муаррифии фарҳанги волои миллати тоҷик, таблиғ ва эҳёи санъати миллӣ, эҳтиром ва арҷгузорӣ ба суннатҳои неки аҷдодӣ, баланд бардоштани сатҳи касбии асарҳои нави мусиқӣ, навозандагӣ, сарояндагӣ, маҳорати касбии ҳунари мусаввирӣ, ҳайкалтарошӣ, ороишгарӣ ва либосдӯзӣ, интихоби намунаҳои беҳтарини оҳангу суруд, коллексияҳо ва асарҳои рассомӣ мебошад.
Таъкид шуд, ки таъсису баргузории озмуни “Тоҷикистон- Ватани азизи ман” ба рушди малакаву истеъдоди санъаткорони касбиву ҳунармандони мардумӣ ва ҳаваскорони наврас такони ҷиддие бахшида, шавқу таваҷҷуҳи ҷомеаро ба фарҳанг, санъати касбии мусиқиву тасвирӣ ва олами илму маънавиёт даҳчанд зиёд намуд.
Дар семинар ҳайати гуруҳи корӣ ба масъулин роҷеъ ба навгонӣ, тағйиру илова ва шартҳои низомномаи озмун дар соли 2025 андешаронӣ намуда, ҷиҳати бартараф намудани камбудиҳо дар самти ҳуҷҷатгузории довталабони озмун маслиҳатҳои муфид доданд.
Бояд гуфт, ки баргузории чунин семинар-машваратҳо дар дигар вилоят ва шаҳру ноҳияҳои мамлакат идома доранд.
