Дар маркази вилояти Хатлон-шаҳри Бохтар бо иштироки гурӯҳи кории ҷумҳуриявӣ дар ҳайати Наврӯз Сангинов, сармутахассиси раёсати санъати дастгоҳи марказии Вазорати фарҳанги Ҷумҳурии Тоҷикистон, Абдуғаффор Мирзозода, муовини ректор оид ба илм ва корҳои эҷодии Донишкадаи давлатии санъати тасвирӣ ва дизайни Тоҷикистон, Анзурат Абдусаломзода, муовини раиси вилоят, Раҳмон Зокирзода, сардори Раёсати фарҳанги вилоят, муовинони раисони шаҳру ноҳияҳо, мудирони шуъбаву бахшҳои мақомоти иҷроияи маҳалии ҳокимияти давлатии вилояти Хатлон семинар-машварат баргузор гардид.
Қайд гардид, ки вохӯрии мазкур ҷиҳати дар амал татбиқ намудани Амри Президенти Ҷумҳурии Тоҷикистон аз 2 январи соли 2025 таҳти рақами АП-711 бобати дар сатҳи баланд ташкил ва баргузор намудани Озмуни ҷумҳуриявии “Тоҷикистон – Ватани азизи ман”, ҳамзамон, фармоиши Вазири фарҳанги Ҷумҳурии Тоҷикистон аз 17 январи соли 2025, таҳти рақами 03 оид ба таъсиси гурӯҳи корӣ ва ҳайати мутасаддиҳо баҳри баргузории семинарҳои муштарак дар бораи Низомномаи Озмуни ҷумҳуриявии “Тоҷикистон – Ватани азизи ман” дар вилоятҳо ва шаҳру ноҳияҳои ҷумҳурӣ доир шуд.
Абдуғаффор Мирзозода зимни баромади худ бо рӯнамо ба ҳозирин тавзеҳ дод, ки Озмуни ҷумҳуриявии «Тоҷикистон – Ватани азизи ман» таҳти cарпарастии Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон аз соли 2019 инҷониб баргузор шуда, мақсади он муаррифии фарҳанги волои миллати тоҷик, таблиғ ва эҳёи санъати миллӣ, эҳтиром ва арҷгузорӣ ба суннатҳои неки аҷдодӣ, баланд бардоштани сатҳи касбии асарҳои нави мусиқӣ, навозандагӣ, сарояндагӣ, маҳорати касбии ҳунари мусаввирӣ, ҳайкалтарошӣ, ороишгарӣ ва либосдӯзӣ, интихоби намунаҳои беҳтарини оҳангу суруд, коллексияҳо ва асарҳои рассомӣ мебошад.
“Бо дастури бевоситаи Пешвои миллат ба соҳибони Шоҳҷоиза ва ғолибони ҷойҳои якум, дуюм ва сеюми Озмун дар баробари мукофоти пулӣ, инчунин имтиёзҳои дигар низ пешбинӣ шудаанд. Аз ҷумла, онҳо ҳуқуқи иштирок дар чорабиниҳои сатҳи ҷумҳуриявӣ ва байналмилалиро пайдо намуда, тавассути барномаҳои телевизионӣ ва радиоӣ муаррифӣ мегарданд. Ғолибони даври ҷумҳуриявии озмун метавонанд ба ихтисосҳои омӯзгории равияи санъати тасвирӣ ва мусиқии муассисаҳои таҳсилоти миёнаи махсус, миёнаи касбӣ ва олии касбии кишвар ба муҳлати се сол бе супоридани имтиҳон дар гурӯҳҳои ройгон дохил шаванд”,-қайд гардид дар баромад.
Ҳамзамон, зикр шуд, ки мувофиқи дастури бевоситаи Пешвои миллат барои иштирокчиёни озмун имтиёзи махсус пешбинӣ гардидааст, ки тибқи он довталабони даври ҷумҳуриявӣ (хонандагони синфҳои 9 ва 11) ба ихтисосҳои соҳаи фарҳанг ва ихтисосҳои омӯзгории равияи санъати тасвирӣ ва мусиқии муассисаҳои таҳсилоти миёна ва олии касбии кишвар бе супоридани имтиҳон ба гурӯҳҳои ройгон қабул карда мешаванд. Инчунин, хонандагон ва донишҷӯёне, ки дар муассисаҳои таълимӣ дар гурӯҳҳои пулакӣ таҳсил мекунанд, дар сурати дар даври ҷумҳуриявӣ сазовори ҷойҳои 1, 2, 3 ва ё Шоҳҷоиза гардидан, ба гурӯҳи ройгони таҳсил гузаронида мешаванд.
Бояд гуфт, ки баргузории чунин семинар-машваратҳо дар дигар вилоят ва шаҳру ноҳияҳо идома доранд.
