Ҳамкасбони азиз! Шумо ва дар шахсияти Шумо тамоми мардуми Тоҷикистонро ба муносибати 31 -солагии Истиқлолияти давлатии Ҷумҳурии Тоҷикистон табрик намуда, бароятон умри дароз, тани сиҳат ва дар касбу коратон бурдбориҳо орзумандам. Истиқлолияти давлатӣ барои мо яке аз муқаддастарин ҷашнҳои миллӣ ба шумор рафта, рамзи озодии миллати тоҷик ва кишвари азизамон мебошад. Истиқлолият нишони озодӣ, ифтихор, номус, рамзи саодат ва бақои миллати тоҷик буда, Тоҷикистони азизи мо маҳз бо шарофати он ҳамчун узви ҷомеаи ҷаҳонӣ эътироф гардид ва дар харитаи сиёсии дунё бо ҳама хусусиятҳои давлатдорӣ арзи ҳастӣ намуд. Дастоварди бузургтарини мо дар тӯли 31 соли Истиқлолият барқарор намудани сулҳу суботи комил ва ваҳдату пойдории миллӣ, таъмини рушди устувори иқтисодию иҷтимоӣ, таҳкими худшиносӣ, худогоҳӣ, болоравии ҳисси ватандӯстию ватандорӣ дар миёни тамоми қишрҳои ҷомеаи Тоҷикистон аст. Имрӯз мардуми сарбаланди мо сиёсати оқилонаю хирадмандона ва дурандешонаи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмонро дар бобати рушди босуръати иқтисодиёту иҷтимоиёт ва ободии кишвари азизамон хуш пазируфта, дар фазои сулҳу оромӣ ва Ваҳдати комил барои баланд бардоштани иқтисодиёти миллӣ бо азму ғайрати бепоён меҳнат карда истодаанд. Донишкадаи давлатии санъати тасвирӣ ва дизайни Тоҷикистон низ зодаи даврони Истиқололият аст ва 30 марти соли 2013 таъсис ёфта, муддати нуҳ сол боз фаъолият менамояд. Дар ин муддат бо дастгириҳои бевоситаи Ҳукумати Ҷумҳурии Тоҷикистон дар донишкада силсилаи корҳои ободонӣ, таҷдиду сохтмонӣ анҷом дода шуда, дар он барои омӯзиши илму ҳунар тамоми шароитҳои зарурӣ муҳайё гардонида шуд. Дастгириҳои Ҳукумати кишвар устодони донишкадаро вазифадор мекунад, ки насли наврас ва ҷавононро дар рӯҳияи ватандӯстиву ифтихори миллӣ, садоқат ба анъанаву суннатҳои таърихиву фарҳангии миллат ва эҳтиром ба арзишҳои умумибашарӣ тарбия намоянд. Имрӯз мо шукронаи онро мекунем, ки дар мамлакатамон марҳилаи созандагиву бунёдкорӣ муваффақ ҷараён дошта, иқтисодёт ва вобаста ба он илму фарҳанг рушд меёбад.
