Имрӯз дар қироатхонаи Донишкадаи давлатии санъати тасвирӣ ва дизайни Тоҷикистон бо ташаббуси китобхона ва кафедраи дизайн ва меъморӣ ба номи Карим Наҷмиддинов маҳфили илмӣ-маърифатии “Дӯстдорони китоб” дар мавзуъҳои “Истифодаи технологияи рақамӣ дар дизайн” ва “Тарроҳи композитсия дар плакатҳо ва реклама” баргузор гардид.
Мудири китобхона Умед Одинабеков маҳфилро ифтитоҳ намуда, аҳаммияти мавзӯъҳои мавриди баррасиро барои донишҷӯёни ихтисоси дизайн ва меъморӣ муҳим арзёбӣ кард. Ӯ зикр намуд, ки имрӯз истифодаи технологияҳои рақамӣ дар соҳаи санъати тасвирӣ ва тарроҳӣ ба як ҷузъи ҷудонашавандаи фаъолияти эҷодии рассомону тарроҳон табдил ёфтааст.
«Имрӯз технологияҳои рақамӣ ба ҷузъи ҷудонашавандаи фаъолияти дизайнер табдил ёфтаанд. Бе донистани воситаҳои рақамӣ имкон надорад, ки мутахассиси муосир бо бозори меҳнат ҳамқадам бошад», – гуфт мудири китобхона.
Сипас, Эсанҷон Валиев, муаллими калони кафедраи дизайн ва меъморӣ ба номи Карим Наҷмиддинов, дар мавзӯи “Истифодаи технологияи рақамӣ дар дизайн” маърӯза кард. Ӯ таъкид намуд, ки яке аз навовариҳои ҷолибтарин дар соҳаи тарроҳӣ ва муҳандисӣ истифодаи воқеияти виртуалӣ (VR) мебошад.
Ба зикри ӯ, бо истифода аз ин технология меъморон ва дизайнерон метавонанд моделҳои пурраи интерактивии лоиҳаҳои худро эҷод намоянд, ки ин ба муштариён имкон медиҳад, то пеш аз татбиқи воқеии тарҳ онро дар фазои маҷозӣ бубинанд ва арзёбӣ кунанд. Воқеияти виртуалӣ на танҳо имкони омӯзиши фазо ва тағйир додани ҷузъҳои тарҳро фароҳам меорад, балки қабули қарорҳои дурустро дар раванди эҷод осон мегардонад.
Дар идома омӯзгори кафедра Муҳаммад Ҳалимов дар мавзӯи “Тарроҳи композитсия дар плакатҳо ва реклама” сухан ронд. Ӯ зикр кард, ки мувозинат ва симметрия аз муҳимтарин унсурҳои композитсия мебошанд.
Ба андешаи ӯ, мувозинати симметрӣ дар ҳолате ба вуҷуд меояд, ки унсурҳои тарҳ дар ҳар ду тарафи меҳвари марказӣ баробар тақсим шаванд, дар ҳоле ки мувозинати асимметрӣ бо вуҷуди нобаробарӣ ҳисси ҳамоҳангиро нигоҳ медорад ва дар реклама таъсири равонӣ ва ҷолибияти визуалӣ мебахшад.
Мудири бахши магистратура, аспирантура ва докторантураи донишкада Фирӯз Ҳаитов низ зимни суханронӣ ба нақши муҳими истифодаи дурусти воситаҳои муосири тарроҳӣ дар рушди зеҳнӣ ва эҷодии донишҷӯён ишора намуд. Ӯ таъкид кард, ки маҳфилҳои илмӣ-амалӣ, ба монанди “Дӯстдорони китоб” на танҳо доираи маърифати иштирокчиёнро густариш медиҳанд, балки онҳоро ба хондани адабиёти илмӣ ва истифодаи захираҳои электронии муосир ҳидоят месозанд.
Дар қисмати саволу ҷавоб иштирокчиён вобаста ба мавзӯъҳои пешниҳодшуда бо маърӯзачиён мубодилаи андеша анҷом дода, ба саволҳои худ ҷавобҳои муфассал гирифтанд.
Дар хотима масъулон изҳори боварӣ намуданд, ки баргузории чунин маҳфилҳо дар оянда низ идома ёфта, ба баланд бардоштани савияи илмӣ, фарҳангии донишҷӯён ва истифодаи босамари технологияҳои рақамӣ дар соҳаи санъати тасвирӣ ва дизайн мусоидат хоҳад кард.
