3 октябри соли равон дар толори Донишгоҳи давлатии молия ва иқтисоди Тоҷикистон дар доираи таҷлили ҷашни “Рӯзи забони давлатии Ҷумҳурии Тоҷикистон ва “Рӯзи Омӯзгор” ҳамоиши ғоявӣ – фарҳангӣ зери унвони “Забони ҳастии миллат, Омӯзгор чароғи маърифат” доир гардид.
Дар кори ҳамоиш Абдураҳим Шоҳиён – раиси Кумитаи иҷроияи ҲХДТ дар шаҳри Душанбе, Бобоҷон Сатторзода – ректори Донишгоҳи давлатии молия ва иқтисодии Тоҷикистон, Атто Ҳамдам – узви итифоқи нависандагони Тоҷикистон, устодону кормандон ва донишҷӯёни Донишгоҳ иштирок намуданд.
Нахуст, Б.Сатторзода ҳозиринро ба муносибати “Рӯзи забони давлатӣ” ва гиромидошти Рӯзи омӯзгорон шодбошӣ намуда, иброз дошт, ки мақому манзалати омӯзгор дар ташаккули фарҳанги ниёгони мо ҳамеша бузург арзёбӣ гардида, ӯро тарбиятгари инсон, чароғи роҳнамо ба сӯйи фардои дурахшон, таконбахши рушди ҷомеа ва саҳмгузори рушди неруи ақлонӣ номидаанд.
Таъкид гардид, ки забони тоҷикӣ дар тули таърихи бо вуҷуди монеаю мушкилоти зиёди дар масири рушд ва ҳатто мавҷудияти он эҷодшуда, ҳамнафасу ҳамқадами миллати тоҷик ва илҳомбахши фаъолияти илмию амалӣ, фарҳангиву маънавӣ ва сиёсию иҷтимоии тоҷикон будааст.
Дар идома Абдураҳим Шоҳиён омӯзгорону донишҷӯёнро ба ҷашнҳои фархунда шодбош намуда, иброз дошт, ки таҳким бахшидани иқтидори илмии кишвар, нерўи зеҳнии қишрҳои фаъоли ҷомеа, устувор гардонидани пояҳои моддиву техникии муассисаҳои таълимӣ, баланд бардоштани сифати таълим дар ҳамаи зинаҳои таҳсилот, ҷалби боз ҳам васеи истеъдодҳои ҷавон ба омӯзиши технологияҳои муосир ва корҳои эҷодиву техникӣ вазифаи муҳимтарини мо дар соҳаҳои илму маориф маҳсуб мегардад.
Ҳизби Халқии Демократии Тоҷикистон ба соҳаи илму маориф эътибори ҷиддӣ дода, ислоҳотро дар ҳамаи зинаҳои таҳсилот бомаром идома медиҳад ва мушкилоти мавҷударо давра ба давра бартараф месозад, афзуд А.Шоҳиён.
Таъкид гардид, ки маҳз бо сиёсати пуштибонӣ ва рушди забон аз ҷониби Пешвои миллат, забони тоҷикӣ имрӯз мақоми олиро соҳиб гашта, ҳамчун забони расмии давлатдорӣ ва илму маърифат мавқеи худро устувор намуд, ки арҷгузорӣ ба забон – арҷгузорӣ ба миллату давлат мебошад ва вазифаи ҳар як шаҳрванди кишвар аст, ки забони модариро ҳифз ва густариш диҳад.
Ҳамзамон, Атто Ҳамдам , вобаста ба арзишҳои соҳибистиқлолӣ суханронӣ намуда, иброз дошт, ки баргузории чунин ҳамоишҳо на танҳо ба таҳкими ҷойгоҳи забони давлатӣ дар ҷомеа мусоидат менамояд, балки ба тарбияи ҳисси худшиносию худогоҳии миллӣ, арҷгузорӣ ба арзишҳои фарҳангӣ ва ифтихори миллӣ низ замина мегузорад.
Дар идомаи чорабинии фарҳангӣ ғолибони озмуни «Шоҳномахонӣ» байни донишҷӯёни донишгоҳҳои ҳудуди шаҳри Душанбе, ки таҳти унвони «Шоҳнома” – оинаи шаҳомати ниёгон» дар доираи «400 рӯзи ташаббускорӣ – иқдоми ҳизбиёни пойтахт барои таҷлили 35-солагии соҳибистиқлолӣ» ва Рӯзи забони давлатии Ҷумҳурии Тоҷикистон доир гардид, муайян ва қадрдонӣ шуданд.
Дар фарҷом ба як зумра омӯзгорон, ки дар амалишавии ҳадафҳои оинномавӣ ва барномавии ҲХДТ саҳм гузоштанд, бо сипосномаи Кумитаи иҷроияи ҲХДТ дар шаҳри Душанбе сарфароз гардиданд.
Ҳамзамон, барномаи фарҳангии фароғатӣ пешкаши ҳозирин гардонида шуд.
