Имрӯз дар Донишкадаи давлатии санъати тасвирӣ ва дизайни Тоҷикистон ба муносибати 33 солагии Истиқлолияти давлатии Ҷумҳурии Тоҷикистон ҳамоиши илмӣ-оммавӣ баргузор гардид.
Дар ҳамоиши мазкур Раиси Федератсияи иттифоқҳои касабаи мустақили Тоҷикистон Неъматзода Маликшо Маҳмадшо, корманди Академияи миллии илмҳои Тоҷикистон н.и.т., дотсент Ғафуров Абдулло, муовини ректор оид ба таълим н.и.ф., и.в. дотсент Худойбердиева Ҷ.Ч ва омӯзгорону донишҷӯён ширкат доштанд.
Ҳамоиши мазкурро муовини ректор оид ба таълим н.и.ф., и.в. дотсент Худойбердиева Ҷ.Ч ифтитоҳ бахшида аҳли толор ва дар шахсияти онҳо тамоми мардуми шарифи Тоҷикистонро ба ин ҷашни бузургу муқаддаси таърихи самимона табрику таҳният намуданд.
Зимни суханронии хеш Худойбердиева Ҷ.Ч таъкид намуданд, ки Истиқлолияти давлатӣ барои мо яке аз муқаддастарин ҷашнҳои миллӣ ба шумор рафта, рамзи озодии миллати тоҷик ва кишвари азизамон мебошад. Истиқлолият нишони озодӣ, ифтихор, номус, рамзи саодат ва бақои миллати тоҷик буда, Тоҷикистони азизи мо маҳз бо шарофати он ҳамчун узви ҷомеаи ҷаҳонӣ эътироф гардид ва дар харитаи сиёсии дунё бо ҳама хусусиятҳои давлатдорӣ арзи ҳастӣ намуд.
Дар идома Раиси Федератсияи иттифоқҳои касабаи мустақили Тоҷикистон- Неъматзода Маликшо суханрони намуда, иброз доштанд, ки дастоварди бузургтарини мо дар тӯли 33- соли Истиқлолият барқарор намудани сулҳу суботи комил ва ваҳдату пойдории миллӣ, таъмини рушди устувори иқтисодию иҷтимоӣ, таҳкими худшиносӣ, худогоҳӣ, болоравии ҳисси ватандӯстию ватандорӣ дар миёни тамоми қишрҳои ҷомеаи Тоҷикистон аст. Имрӯз мардуми сарбаланди мо сиёсати оқилонаю хирадмандона ва дурандешонаи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмонро дар бобати рушди босуръати иқтисодиёту иҷтимоиёт ва ободии кишвари азизамон хуш пазируфта, дар фазои сулҳу оромӣ ва Ваҳдати комил барои баланд бардоштани иқтисодиёти кишварамон бо азму ғайрати бепоён кору фаъолият намуда истодаанд.
Сипас номзади илмҳои таърих, дотсент Ғафуров Абдулло вобаста ба таърихи ба даст овардани Истиқлолияти давлатӣ ва муборизаҳои истиқлолхоҳии халқи шарафманди тоҷик дар масири таърих аз нуқтаи назари илмӣ ибрози андеша намуданд.
Дар фарҷом Ректори Донишкада н.и.м., профессор Ғанизода Ҷамшед Шуҷоат аҳли толорро ба муносибати ҷашни 33-солагии Истиқлолияти давлатии Ҷумҳурии Тоҷикистон табрику таҳният намуда, ба меҳмонон ҳамчун рамзи эҳтиром туҳфаҳои хотиравӣ ҳамчун “армуғон”бахшида ба ин санаи муқаддасу сарнавиштсоз дар фазои тантанавӣ супориданд.
