Таҳти ҳамин унвон санаи 4-уми октябри соли ҷорӣ дар толори намошии Донишкадаи давлатии санъати тасвирӣ ва дизайни Тоҷикистон намоиши асарҳои наққошии устодон ва шогирдони моҳири кафедраи санъати ороиши амалӣ ва монументалии Донишкада сурат гирифт.
Дар намоиши мазкур ҳайати профессорону омӯзгорон, донишҷӯёну магистрантон, як зумра намояндаҳои давлатҳои хориҷӣ, корпусҳои дипломатӣ, идораву ташкилотҳои дохиливу хориҷӣ иштирок доштанд.
Намоиши мазкурро ректори Донишкада н.и.м., профессор Ғанизода Ҷамшед Шуҷоат ифтитоҳ намуда, қайд намуд, ки бо шарофати сиёсати хирадмандона ва фарҳангпарваронаи Асосгузори сулҳу ваҳдати миллӣ-Пешвои миллат Президенти Ҷумҳурии Тоҷикистон муҳтарам Эмомалӣ Раҳмон баҳри рушди тамоми соҳаҳо, махсусан соҳаи санъати тасвирӣ, санъати ороиши амалӣ, дизайн, эҳё ва рушди ҳунарҳои мардумӣ шароит ва имкониятҳои мусоид фароҳам оварда шудааст. Қайд гардид, ки зинда гардонидани навъи санъати наққошии халқи тоҷик — кундалро дар 11- соли фаъолияти хеш Раёсати донишкада, дар маркази таваҷҷӯҳи асосӣ қарор дода дар ин самт ба дастовардҳои назаррас ноил гардидааст.
Дар идома Устодони варзидаи соҳа суханронӣ намуда, баргузории намоишро яке аз дастовардҳои муҳими Донишкада арзёбӣ намуда, оид ба таърихи санъати кундал, рушди ин навъи санъат аз даврони қадим то ба имрӯз изҳори назар намуданд.
Дар намоиш беш аз 60 асари тозаэҷоди наққошии Устодони варзидаи соҳа, аз ҷумла Рақибов Маҳмадкарим, Бойматова Муноҷот, Шифоев Сорбон, Сатторова Мавҷигул ва шогирдони донишкада ба маърази тамошо гузошта шуд, ки аз рушди бесобиқаи санъати кундалнигорӣ дар даврони соҳибистиқлолии Тоҷикистони азиз гувоҳи медиҳад.
Тамошобинон бо самимияту ихлоси беандоза ба ин ҳунар, ки бо усули анъанавии санъати қадимаи халқи тоҷик эҷод шудаанд, таваҷҷӯҳи хоса зоҳир намуданд.
Бояд қайд намуд, ки намоиши асарҳои наққошии кундал дар Донишкада бори аввал набуда, пайваста Раёсати Донишкада ташкил ва баргузории чунин намоиши сатҳи баландро ҳам дар дохил ва ҳам дар хориҷ аз кишвар роҳандози намудаистодааст.
