Тибқи супориши ректори Донишкадаи давлатии санъати тасвирӣ ва дизайни Тоҷикистон ва дар асоси ҷадвал ва Нақша-чорабиниҳои тасдиқгардида, кормандону омӯзгорони Донишкада ба шаҳру ноҳияҳои ҷумҳурӣ барои тарғибу ташвиқи Донишкада, равия ва ихтисосҳои дар он мавҷудбуда ва ҳамкорӣ намудан бо нуқтаҳои бақайдгирии ММТНПҶТ ба сафари хизматӣ фиристонида шуданд. Бояд тазаккур дод, ки ҳадаф аз чунин вохӯриҳо пеш аз ҳама муаррифии Донишкада, шинос намудани хатмкунандагони МТМУ, литсей ва гимназияҳои ҷумҳурӣ ба самтҳо, равияҳо, ихтисосҳо ва шароиту имкониятҳои касбомӯзӣ дар муассисаи мазкур, шарҳу тавзеҳи мафҳум ва моҳияти касбу ҳунар, роҳҳои дурусти интихоби касб, моҳияти соҳибкасб гардидан, ҳамзамон ҷалби наврасону ҷавонон ба омӯзиши касбу ҳунар ва зебоипарастӣ мебошад.
Маврид ба зикр аст, ки Донишкадаи давлатии санъати тасвирӣ ва дизайни Тоҷикистон, дар ҷумҳурӣ ягона муассисаи таҳсилоти олии касбии соҳаи санъати тасвирӣ ва дизайн ба шумор рафта, дар он беҳтарин рассомон, аз ҷумла Арбобони ҳунари Тоҷикистон, профессорону дотсентҳо бо истифода аз методу усулҳои муосири таълим ба донишҷӯён дарс мегӯянд.Самти таълим дар Донишкада асосан ба эҷод нигаронида шуда, донишҷӯён бо истифода аз роҳу воситаҳои муосири донишомӯзӣ, махсусан технологияи компютерӣ ба омӯзиш ва корҳои илмию эҷодӣ ҷалб карда мешаванд. Таълим дар Донишкада бо забонҳои давлатӣ ва русӣ ба роҳ монда шуда, дар он мутахассисони рақобатпазир ба бозори меҳнат омода карда мешавад.
