Имрӯз, 13 феврали соли 2024, соати 09:00 дар Донишкадаи давлатии санъати тасвирӣ ва дизайни Тоҷикистон нишасти матбуотӣ оид ба фаъолияти муассиса дар нимсолаи дуюми соли 2023 бо иштироки намояндагони воситаҳои ахбори омма баргузор гардид.
Нишасти матбуотиро ректори Донишкадаи давлатии санъати тасвирӣ ва дизайни Тоҷикистон Ғанизода Ҷамшед Шуҷоат ҳусни оғоз бахшида, аз ҷумла иброз намуданд, ки дар давраи ҳисоботӣ Донишкада дар самти таълим, илм, корҳои эҷодӣ, тарбия, робитаҳои байналмилалӣ ва молиявию хоҷагидорӣ ба натиҷаҳои назаррас ноил гардидааст.
Ӯ дар идомаи суханронии хеш қайд намуд, ки Ҳукумати Ҷумҳурии Тоҷикистон ба соҳаи санъати тасвирӣ ва дизайн таваҷҷуҳи махсус зоҳир менамояд, ки далели ин гуфтаҳо дастгирӣ ёфтани пешниҳоди Вазорати фарҳанги Ҷумҳурии Тоҷикистон ва Донишкада оиди ворид намудани ду номинатсияи дигар ба Низомномаи озмуни ҷумҳуриявии “Тоҷикистон – Ватани азизи ман” мебошад.
Қайд гардид, ки дар давраи ҳисоботӣ Донишкада ба чунин дастовардҳои назаррас ноил гардидааст, аз ҷумла:
- дар Донишкада Конференсияи байналмилалии илмӣ-назариявӣ зери унвони «Рушди дизайн, санъат, технология ва илмҳои гуманитарӣ дар даврони Истиқлолияти Ҷумҳурии Тоҷикистон» гузаронида шуд;
- дар арафаи таҷлили 32-юмин солгарди Истиқлолияти давлатии Ҷумҳурии Тоҷикистон 1-нафар корманди Донишкада бо мукофоти давлатии нишони Хизмати шоиста сарфароз гардонида шуд;
- дар Озмуни ҷумҳуриявии “Тоҷикистон – Ватани азизи ман” 2 нафар дастпарварони Донишкада дар номинатсияҳои санъати тасвирӣ ва дизайн барандаи Шоҳҷоизаи озмун ва 11 нафари дигар сазовори ҷойҳои намоён гардиданд, аз ҷумла 2 нафар омӯзгорони Донишкада сазовори ҷойи якум, ва аз шумораи донишҷӯён бошад 5 нафар сазовори ҷойи дуюм ва 4 нафар сазовори ҷойи сеюм;
- аз тарафи бахши такмили ихтисос ва бозомўзии кадрњои Донишкада 1 курс бо фарогирии 7 нафар шунаванда дар равияи санъати тасвирї ташкил карда шуд;
- масъулини самти робитаҳои байналмилалии Донишкада дар наздик ба 10 чорабиниҳо, фестивалҳо, форумҳо ва вохӯриҳои сатҳи байналмилалӣ иштирок намуда, дар ин давра бо 5 муассисаи таҳсилоти олии касбии Федератсияи Россия ва Ҷумҳурии Узбекистон созишномаи ҳамкорӣ дар соҳаҳои маориф, фарҳанг, санъати тасвирӣ, сафарбарии академӣ, мубодилаи донишҷӯён, ташкили таҷрибаомӯзиҳо ва такмили ихтисоси кормандону омӯзгорон ба имзо расонидаанд.
- бо мақсади баланд бардоштани сифати таҳсил як қатор таҷҳизотҳои зарурӣ, аз ҷумла 15 адад компютерҳои пуриқтидор, 40 адад мизи дарсӣ ва 80 адад курсӣ ва дигар молу таҷҳизотҳои зарурӣ харидорӣ карда шуд.
- 10 нафар донишҷӯёни курси 3 кафедраи санъатшиносӣ бо 2 нафар омӯзгори кафедра ба таҷрибаомӯзии таълимӣ (шиносоӣ) бо мақсади шиносоӣ пайдо намудан бо ёдгориҳои таърихии шаҳрҳои Самарқанду Бухоро ба Ҷумҳурии Ӯзбекистон фиристонида шуданд.
- бо мақсади дастгирии донишҷӯёни ниёзманд ва ятимони кул бо ташаббуси Раёсат ва Иттифоқи касабаи Донишкада аз моҳи январи соли 2020 инҷониб ҳамасола ба 20 нафар донишҷӯёни ятим ва аълохонҳои гуруҳҳои шартномавӣ аз ҷониби ҶДММ “Фаридун” ҳар моҳ ба андозаи 100 сомонӣ ба як нафар кӯмакпулӣ дода мешавад.
Дар нишасти матбуотӣ хабарнигорон аз “АМИТ Ховар”, телевизиони “Ҷаҳоннамо”, “Илм ва табиат” “Баҳористон”, рӯзномаю маҷаллаҳои “Ҷумҳурият”, “Садои мардум”, “Ҷавонони Тоҷикистон”, “Бонувони Тоҷикистон”, “Омӯзгор”, “Масъалаҳои методикаи таълим”, “Мароми пойтахт, “Садои Душанбе”, “ радиои “Тоҷикистон”, “Овози тоҷик”, “Фарҳанг” иштирок доштанд.
Дар интиҳо миёни рӯзноманигорон ва масъулини соҳа бахши саволу ҷавоб доир гардида, ба онҳо аз ҷониби масъулин посухҳои мушаххас ва мусбӣ гардонида шуд.
