Ҳамкасбони гиромӣ, устодону донишҷӯёни азиз!
Бо эҳсоси ифтихору самимият ҳамаи шуморо ба ифтихори Рӯзи Конститутсияи Ҷумҳурии Тоҷикистон, ки ҳамасола 6-уми ноябр таҷлил мегардад, аз номи роҳбарият ва ҳайати профессорону омӯзгорони Донишкадаи давлатии санъати тасвирӣ ва дизайни Тоҷикистон самимона табрик менамоям!
Қабули Конститутсияи Ҷумҳурии Тоҷикистон 6 ноябри соли 1994 яке аз рӯйдодҳои тақдирсози таърихи давлатдории навини миллати тоҷик маҳсуб мешавад. Ин санади олии ҳуқуқӣ ҳамчун рамзи истиқлолият, ваҳдат ва пойдории давлатдорӣ ба мардуми Тоҷикистон имконият дод, ки роҳи рушди озод, мустақил ва демократиро интихоб намояд.
Конститутсия бо хиради халқи тоҷик, иродаи қавии фарзандони ватандӯст ва роҳнамоии Пешвои муаззами миллат, Президенти Ҷумҳурии Тоҷикистон муҳтарам Эмомалӣ Раҳмон таҳияву қабул шуда, имрӯз ба ҳайси санади асосии ҳуқуқӣ ва дастури бунёди ҷомеаи ҳуқуқбунёд, демократӣ ва инсонмеҳвар хизмат мекунад.
Конститутсияи кишвари мо бо арзишҳои волои умумибашарӣ ҳамнаво буда, ҳуқуқу озодиҳои инсонро дар маркази диққат қарор медиҳад. Он асоси фаъолияти устувори тамоми ниҳодҳои давлатӣ ва ҷомеаро муайян намуда, барои татбиқи адолати иҷтимоӣ, баробарӣ, ваҳдат ва ҳамдигарфаҳмӣ миёни шаҳрвандон заминаи воқеӣ гузоштааст.
Дар давраи соҳибистиқлолӣ Конститутсия ҳамчун дастури роҳнамо тамоми соҳаҳои ҳаёти сиёсӣ, иқтисодӣ, иҷтимоӣ ва фарҳангии кишварро ба самти рушду такомули устувор ҳидоят намуд. Имрӯз бо шарофати татбиқи принсипҳои конститутсионӣ Тоҷикистон дар роҳи созандагӣ, шукуфоӣ ва эҳёи фарҳанги миллӣ қадамҳои устувор мегузорад.
Ҳунару фарҳанг, ки рукни муҳими худшиносии миллӣ ва пояи маънавии давлатдорӣ мебошанд, дар партави Конститутсия рушд ёфта, барои ташаккули маҳорати зеҳнию бадеии ҷавонон имкониятҳои васеъ фароҳам овардааст. Донишкадаи давлатии санъати тасвирӣ ва дизайни Тоҷикистон низ бо такя ба талаботи ин қонуни асосӣ, сиёсати фарҳангпарваронаи Ҳукумати кишвар ва роҳнамоиҳои Пешвои миллат фаъолияти худро ба таҳкими зебоишиносӣ, худогоҳии миллӣ ва тарбияи кадрҳои соҳибмаҳорат дар соҳаи санъат ва дизайн равона намудааст.
Конститутсияи Ҷумҳурии Тоҷикистон рамзи Ваҳдати миллӣ, кафолати ҳуқуқу озодиҳои инсон ва нишондиҳандаи соҳибихтиёрии давлат мебошад. Дар асоси моддаҳои ин санади муқаддас миллати тоҷик тавонист давоми 31 соли қабули он сулҳу субот, амният ва ҳамдигарфаҳмиро ҳифз карда, пояҳои давлатдории худро мустаҳкам намояд.
Бигузор ин рӯзи таърихӣ барои ҳар як кадоми Шумо рӯзи шукргузорӣ аз Ватани соҳибистиқлол ва ифтихор аз якпорчагии миллат бошад! Мо — аҳли ҷомеаи эҷодиву илмии Донишкада вазифадорем, ки бо меҳнати содиқона, офаридани асарҳои арзишманди инъиоскунандаи талаботи ин ҳуҷҷат ва тарбияи мутахассисони сазовор ба татбиқи меъёрҳои Конститутсия ва сиёсати фарҳангиву маънавии давлат саҳми муносиб гузорем.
Бо ин ниятҳои нек, ҳамаи Шуморо бо фарорасии Рӯзи Конститутсияи Ҷумҳурии Тоҷикистон самимона табрик гуфта, ба ҳар як устод, корманд ва донишҷӯи Донишкада саломативу иқболи нек, илҳоми эҷодӣ ва муваффақиятҳои нав орзу менамоям. Бигузор Ватани азизи мо — Тоҷикистони соҳибистиқлол ҳамеша обод, соҳибэҳтиром ва дар зери сояи Конститутсияи адолатпарвар шукуфон бошад!
Рӯзи Конститутсияи Ҷумҳурии Тоҷикистон муборак бод!