Дар доираи нақша-чорабиниҳои Кумитаи иҷроияи Ҳизби Халқии Демократии Тоҷикистон дар ноҳияи Шоҳмансури шаҳри Душанбе ва Раёсати Донишкадаи давлатии санъати тасвирӣ ва дизайни Тоҷикистон бо мақсади сазовор пешвоз гирифтани “Рӯзи пойтахти Ҷумҳурии Тоҷикистон- шаҳри Душанбе” Озмуни рассоми беҳтарин таҳти унвони “Ту қалби Тоҷикистони Душанбе” бо иштироки донишҷӯёни Донишкада ташкил ва гузаронида шуд.
Зимни баргузории озмуни мазкур ҳар яке аз иштирокчиён бо маҳорати хос ва сабку услуби ба худ мувофиқ гушаҳои зебои пойтахти азизамон- шаҳри Душанберо руйи варақ тасвир намуда, беҳтарин мусаввараҳоро эҷод намуданд.
Бояд қайд намуд, ки ташкил ва баргузории чунин озмунҳо, ин як навъ тарғиби зебоипарастӣ маҳсуб ёфта, ба ин васила сокинони пойтахт, махсусан насли ҷавону наврасро дар рӯҳияи зебоипарастӣ, хештаншиносӣ ва худогоҳиву меҳанпарастӣ метавон тарбият кард.
Дар ин замина таъкид намудан ба мавридаст, ки чунин озмунҳо бо мақсади баланд бардоштани малака ва маҳорати касбии донишҷӯёни ихтисосҳои санъати тасвирӣ ва дизайн дар Донишкадаи давлатии санъати тасвирӣ ва дизайни Тоҷикистон мунтазам гузаронида мешаванд.
Дар интиҳои ғолибони озмуни мазкур аз ҷониби ҳайати комиссия муайян карда шуда, бо туҳфаҳои хотиравии КИ ҲХДТ дар ноҳияи Шоҳмансур ва Раёсати Донишкадаи давлатии санъати тасвирӣ ва дизайни Тоҷикистон сарфароз гардонида шуданд.
