Дар Донишкадаи давлатии санъати тасвирӣ ва дизайни Тоҷикистон вохӯрии судманду хотирмон миёни роҳбарияти муассиса ва иҷрокунандаи вазифаи Сафири Фавқулодда ва Мухтори Ҷумҳурии Исломии Покистон дар Ҷумҳурии Тоҷикистон ҷаноби Ризван Гул баргузор гардид.
Зимни мулоқот ректори Донишкада меҳмони олиқадрро хайрамақдам гуфта, таъкид намуд, ки Ҷумҳурии Исломии Покистон яке аз кишварҳои дӯст ва шарики муҳими Тоҷикистон ба шумор рафта, равобити дуҷониба солҳои охир дар соҳаҳои гуногун, аз ҷумла маорифу фарҳанг, рӯ ба рушд дорад, зеро санъат ва фарҳанг ҳамчун василаи нозуку муассири ҳамгироии халқҳо метавонанд заминаи устувор барои густариши муносибатҳои байнидавлатӣ фароҳам оваранд.
Дар ҷараёни мулоқот ҷаноби Ризван Гул аз пазироии самимӣ изҳори сипос намуда, зикр кард, ки Покистон ба рушди ҳамкориҳо бо муассисаҳои таҳсилоти олии Ҷумҳурии Тоҷикистон, бахусус дар соҳаи санъати тасвирӣ, дизайн ва фарҳанг таваҷҷуҳи хоса дорад. Таъкид гардид, ки санъат забони умумибашарӣ буда, метавонад халқҳоро новобаста аз фарқиятҳои забонӣ ва фарҳангӣ ба ҳам наздик созад.
Дар идома ҷонибҳо масъалаҳои марбут ба табодули таҷриба, роҳандозии барномаҳои муштараки таълимӣ, баргузории намоишҳои асарҳои рассомони ҳарду ҷониб, симпозиумҳо, мастер-классҳо ва иштирок дар фестивалҳои байналмилалиро мавриди баррасӣ қарор доданд. Ҳамчунин, имкони ҷалби донишҷӯён ва омӯзгорон ба барномаҳои омӯзишӣ ва фарҳангии муштарак ҳамчун яке аз самтҳои ояндадори ҳамкорӣ арзёбӣ гардид.
Ректори муассиса таъкид намуд, ки Донишкадаи давлатии санъати тасвирӣ ва дизайни Тоҷикистон дорои имкониятҳои мусоиди таълимӣ ва эҷодӣ буда, омода аст дар доираи ҳамкориҳои байналмилалӣ таҷрибаи худро бо муассисаҳои ҳамтои Покистон мубодила намояд.
Дар мулоқот зикр гардид, ки баргузории чунин вохӯриҳо ба баланд бардоштани нуфузи донишкада дар арсаи байналмилалӣ ва рушди ҷаҳонбинии эҷодии донишҷӯён мусоидат мекунад.
Дар анҷоми мулоқот ҷонибҳо омодагии худро ҷиҳати идомаи муколамаи созанда ва таҳияи пешниҳодҳои мушаххас барои ба роҳ мондани ҳамкориҳои амалӣ изҳор намуданд. Мулоқоти мазкур ҳамчун қадами муҳим дар самти таҳкими робитаҳои фарҳангӣ ва таълимӣ арзёбӣ гардида, ба рушди минбаъдаи ҳамкориҳои дӯстонаи Тоҷикистону Покистон заминаи мусоид мегузорад.
Мулоқот дар фазои ҳусни тафоҳум ва дӯстӣ сурат гирифта, ба таҳкими ҳамкориҳои фарҳангӣ, илмӣ ва таълимӣ байни ду кишвар равона шуд.