4 сентябри соли 2007 Президенти Ҷумҳурии Тоҷикистон муҳтарам Эмомалӣ Раҳмон зимни гузоштани санги асос ба бунёди Китобхонаи миллии Тоҷикистон иброз намуданд, ки «бо назардошти аҳамияти бузурги китобу китобдорӣ ва донишу маърифат пешниҳод менамоям, ки дар қатори идҳои дигар рӯзи оғози сохтмони Китобхонаи миллӣ ҳамчун Рӯзи китоб муқаррар карда шавад».
Боиси ифтихор ва сарфарозист, ки мардуми шарафманди Тоҷикистон баробари дигар ҷашнҳои таърихӣ ҳамасола дар ҷумҳурӣ санаи 4-уми сентябр ҳамчун Рӯзи китоб ҷашн гирифта мешавад. Китоб ин бузургтарин маъхази гаронбаҳоест, ки қадру манзалати ниҳоят баланд дошта, дар тули таърих қимату манзалати худро гум накардааст.
Истиқлолияти миллӣ барои миллати шарифи мо муқаддастарин ва арзишмандтарин неъмат буда, барои рушду нумӯи тамоми соҳаҳои ҳаёти ҷомеа шароити мусоид фароҳам овард. Пас аз ба даст овардани Истиқлолият Ҷумҳурии Тоҷикистон ба марҳилаи нави рушди сиёсӣ, иҷтимоӣ ва фарҳангӣ ворид гардид. Яке аз самтҳои асосӣ дар ин давра рушди таъмини маънавиёти ҷомеа, хусусан, рушди зеҳни инсонӣ, аз ҷумла рушди китоб ва китобдорӣ мебошад. Бузурге фармудааст:
Ҳар он миллат, ки устодаш китоб аст,
Дилаш равшан ба мисли офтоб аст.
Бо ташаббус ва дастгириҳои бевоситаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар радифи самтҳои гуногуни илму маърифат ба соҳаи китобдорӣ низ таваҷҷуҳи хоса зоҳир карда шуд. Воқеан, дар ташаккули андешаи миллӣ ва таҳкими истиқлол нақши китоб хеле бузург аст. Маҳз ҳамин дастгириҳои маърифатпарваронаи Пешвои муаззами миллат, аст ки солҳои охир соҳаи китобдорӣ, илму ирфон рӯз ба рӯз рушд намуда истодааст.
Тақдими китоб барои мардуми тоҷик анъанаи нек аз гузаштагон буда, имрӯз равнақи бештар ёфтааст. Бузурге гуфтааст, ки «агар дар зиндагӣ ба нокомӣ дучор шавӣ бидон, ки кам китоб хондаӣ» Зеро китоб муаллимест, ки бе моро тарбия мекунад.
Ҳукумати Ҷумҳурии Тоҷикистон ба таври ҳамешагӣ ба рушду нумӯи соҳаи китобдорӣ ва китобхон намудани насли наврасу ҷавон таваҷҷуҳи хосса зоҳир менамояд. Ҳамин аст, ки бахшида ба 30-солагии Истиқлоли давлатӣ аз номи Президенти Ҷумҳурии Тоҷикистон муҳтарам Эмомалӣ Раҳмон марҳила ба марҳила ба ҳар оилаи мамлакат китоби «Тоҷикон»-и Бобоҷон Ғафуров туҳфа гардид. Ҳамчунин 5 декабри соли 2023 Президенти Ҷумҳурии Тоҷикистон муҳтарам Эмомалӣ Раҳмон зимни суханронӣ дар Симпозиуми байналмилалӣ ба ифтихори 115-солагии академик Бобоҷон Ғафуров дастур доданд, ки ба хотири огоҳии ҳарчи бештари мардум аз таъриху фарҳанги аҷдодон «Шоҳнома»-и безаволи Абулқосим Фирдавсӣ нашр ва ба тамоми мардуми ҷумҳурӣ дастрас шавад.
Китоб дар ҳаёт чун омӯзгори беминат хизмат намуда, инсонро ба ростию накӯкорӣ, хирадмандиву мардонагӣ ва матонату бузургӣ роҳнамоӣ мекунад. Маҳз барои ҳамин ҳар яки моро, алалхусус омӯзгоронро зарур аст, ки насли ҷавонро барои пос доштани фарҳангу забон, арзишҳои миллӣ, дӯсти беминнат интихоб кардани китоб ва истиқлоли давлатии худ роҳнамиву тарбият намоем.
Ҳумоюн дар замин Рӯзи китоб аст,
Китоб аз баҳри инсон ҳамчу об аст.
Ба ин гавҳар касе, ки дил бибандад,
Канори зиндагонӣ комёб аст.
мудири кафедраи забонҳо ва фанҳои гуманитарии
Донишкадаи давлатии санъати тасвирӣ ва дизайни Тоҷикистон, номзади илмҳои педагогӣ, дотсент
