Имрӯз дар Осорхонаи миллии Тоҷикистон бо мақсади тарғибу ташвиқи дастовардҳои замони истиқлолияти давлатӣ ва ҳадафҳои стратегии кишвар намоиши асарҳои рассомони Тоҷикистон таҳти унвони “Роғун – кохи нур” баргузор гардид.
Дар қисмати ифтитоҳи расмии намоиш мудири бахши фарҳанг ва иттилооти Дастгоҳи иҷроияи Президенти Ҷумҳурии Тоҷикистон Фаридун Бобозода, вазири фарҳанги Ҷумҳурии Тоҷикистон Сатториён Матлубахон Амонзода, муовини раиси шаҳри Душанбе Одилзода Дилбар Раҳим, муовини якуми раиси Ҳизби Халқии Демократии Тоҷикистон Маликшо Неъматзода, директори Осорхонаи миллӣ Иброҳимзода Зафаршо Сафо, раиси Иттифоқи рассомони Тоҷикистон Наргис Ҳамидова ва сардори Раёсати кадрҳои ҶСП “НБО Роғун” Абдулаҳадзода Сайдулло иштирок намуданд.
Ҳамзамон, дар кори намоиш дар баробари намояндагони дигар муассисаҳои соҳаи фарҳангу санъат ва намояндагони васоити ахбори омма устодону донишҷӯёни Донишкадаи давлатии санъати тасвирӣ ва дизайни Тоҷикистон таҳти роҳбарии ректори муассиса Сироҷиддин Ҷурахонзода ширкат намуданд.
Иштирокчиён роҷеъ ба таърихи бунёд ва рушду азнавсозии фаъолияти НБО-и Роғун суханронӣ намуда, таъкид доштанд, ки дар замони соҳибистиқлолии кишвар бо талошу заҳматҳои Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ду чархаи НБО-и Роғун ба кор шуруъ намуд, ки ин муҳимтарин дастоварди энергетикии кишвар маҳсуб меёбад.
Тасвири фаъолияти гуногунҷабҳаи НБО-и Роғун дар асарҳои рассомони Тоҷикистон падидаи муҳимми фарҳангӣ буда, дар муаррифии корномаҳои бунёдкорони Роғун нақши назаррас доранд.
Дар доираи намоиш зиёда аз 100 асари санъати тасвирӣ ва ороишӣ-амалӣ, ки маҳсули эҷоди рассомон-мусаввирон, графикон, муҷассамасозон, наққошон ва кандакорони кишвар мебошанд пешниҳоди тамошобинони дохилию хориҷӣ гардонида шуданд.
Ҳар як асари барои намоиш офаридашуда баёнгари эҳсосоти амиқ ва руҳияи баланди ватандӯстонаи эҷодкорон аст, зеро Неругоҳи барқи обии «Роғун» ҳамчун манбаи нур Тоҷикистонро ба ахтари ҳамеша тобон табдил хоҳад дод, чуно «Роғун» ин нур, ободӣ, шараф, ифтихор ва зиндагии шоистаи мардуми тоҷик аст!
Бояд гуфт, ки дар намоиш асарҳои эҷодии як зумра устодони Донишкада, ки инъикосгари симои аҳли заҳмати ин ҷабҳаи меҳнат ва бузургтарин нерӯгоҳи асранд, ба маърази тамошо гузошта шудаанд.
