Саннаи 3 майи соли равон дар Осорхонаи миллии Тоҷикистон намоиши асарҳои рассом–миниатурнигори маъруфи тоҷик, омӯзгори кафедраи графика ва миниатюраи ба номи Фаррух Хоҷаеви Донишкадаи давлатии санъати тасвирӣ ва дизайни Тоҷикистон, академики Академияи рассомони Тоҷикистон Камолзода Олим Аъзам ба ифтихори бузургдошти шоҳасари безаволи адабиёти форсу тоҷик – “Шоҳнома”-и Абулқосим Фирдавсӣ ва 700-солагии шоири ғазалсарои форсу-тоҷик Ҳофизи Шерозӣ ифтитоҳ гардид.
Дар қисмати ифтитоҳи расмии намоиш директори Осорхонаи миллӣ Иброҳимзода Зафаршо Сафо, Сафири Фавқулода ва Мухтори Ҷумҳурии Фаронса дар Ҷумҳурии Тоҷикистон хонум Элза Пинёл, Раиси Иттифоқи рассомони Тоҷикистон Наргис Ҳамидова, муовини аввали ректори Донишкадаи давлатии санъати тасвирӣ ва дизайни Тоҷикистон Худойбердиева Ҷамила Чоршанбиевна ва дигар рассомону санъатшиносони маъруфи кишвар иштироку суханронӣ намуданд.
Дар намоиш кормандони Осорхонаи миллӣ, устодону донишҷӯёни Донишкадаи давлатии санъати тасвирӣ ва дизайни Тоҷикистон, Донишкадаи давлатии фарҳанг ва санъати Тоҷикистон ба номи Мирзо Турсунзода, Коллеҷи ҷумҳуриявии рассомии ба номи М.Олимов, намояндагони ВАО, меҳмонони дохиливу сайёҳони хориҷии кишвар ва дӯстдорони ҳунару санъат ширкат карданд.
Зимни суханрониҳо зикр гардид, ки Олим Камолзода беш аз 40 сол боз бо санъати миниатюра машғул буда, аз ворисони воқеии Камолиддини Беҳзод аст. Ӯ ҳамчун аввалин миниатюранигор дар Тоҷикистон ба рушди ин равияи санъат муваффақ шудааст.
Номбурда то имрӯз шогирдони зиёдеро дар ин самт тарбия кардааст, ки ҳоло дар Тоҷикистон ва дигар кишварҳои хориҷӣ дар ин равия фаъолият доранд. Устод дар давоми қариб 25 сол сабку салиқаи вижа ёфта, мактаби худро сохтааст. Ӯ ба ҷуз аз корҳои эҷодӣ дар тарбияи донишҷӯён низ саҳми калон дошта, дар Донишкадаи давлатии санъати тасвирӣ ва дизайни Тоҷикистон ба шогирдон дарс медиҳад. Устод дар рафти машғулият ва дарсҳо бисёр мекӯшад, ки шогирдонаш аз нозукиҳо ва талаботи миниатюранигорӣ огоҳ бошанд ва ин жанрро дар кишвар ба пуррагӣ эҳё намуда, равнақ диҳанд.
Ҳамин тавр, дар намоиш 50 миниатюраҳои гуногуни муаллиф, хусусан силсилаҳо аз саҳифаҳои рангини “Шоҳнома”-и Абулқосим Фирдавсӣ ва офаридаҳои мусаввир хос ба эҷодиёти пурғановати Ҳофизи Шерозӣ, ба монанди «Инкишофи оташи шоҳ Ҳушанг», «Парвози Кайковус ба ҳаво», «Кайковус дар интихоби асп», «Шикори бабр», «Таваллуди Рустам», «Рустам аспи худ Рахшро ром мекунад», «Хофиз», «Гуфтугӯи падар бо писар», «Баҳори дилҳо» ва дигар офаридаҳои мусаввир, ки дар солҳои мухталиф рӯи кор омадаанд, ба намоиш гузошта шуданд.
Намоиш имконияти нодир барои пайгирии раванди ташаккул ва такомули мактаби тоҷиконаи миниатюра, ки устод Олим Камолзода беш аз 40 сол боз дар асоси мероси бузурги Камолиддин Беҳзод рушд медиҳад, ба ҳисоб меравад.
Намоиши мазкур на танҳо арҷгузорӣ ба шоҳасар ва шоири шаҳири адабиёти форсу-тоҷик, балки саҳми арзандае дар ҳифз ва рушди суннатҳои миллии рассомии Тоҷикистон ба шумор рафта, меҳмонони дохилӣ, сайёҳони хориҷӣ ва дӯстдорони санъату ҳунар имкон доранд, ки то 25 майи соли равон аз намоиши мазкур боздид намоянд.
