Имрӯз дар Донишкадаи давлатии санъати тасвирӣ ва дизайни Тоҷикистон ҷашни байналмилалии Наврӯз бо шукуҳу шаҳомати хоса таҷлил гардид.
Қабл аз оғози тантанаҳои идона намоиши асарҳои эҷодии омӯзгорону донишҷӯён таҳти унвони “Аз Наврӯз то Наврӯз” ифтитоҳ гардид.
Дар расми кушодшавии намоишгоҳ Сафарзода Давлат Шариф, муовини вазири фарҳанг, Наргис Ҳамидова, раиси Иттифоқи рассомони Тоҷикистон, Ҷурахонзода Сироҷиддин Шамсулло, ректори Донишкада, муовинони ректор, намояндагони сафоратхонаҳо ва корпусҳои дипломатии муқими шаҳри Душанбе, рассомони шинохтаи кишвар, кормандону омӯзгорон, донишҷӯён ва меҳмонон аз Ҷумҳурии Мардумии Чин, кишварҳои Ҳиндустон, Покистон, Туркия, Корея, Россия, Эрон ва чанди дигар иштирок намуданд.
Намоишро Сироҷиддин Ҷурахонзода ифтитоҳ намуда, иброз дошт, ки ҷашни байналмилалӣ эълон гардидани Наврӯзи фархундапай барои боз ҳам амиқу дақиқ, возеҳу равшан тасвир ва ба таври васею доманадор бо шукуҳу шаҳомати хосса таҷлил гардидани он шароити мусоид муҳайё кард.
“Маҳз ташаббусу талошҳои саривақтии Пешвои миллат буд, ки Наврӯз ба ҳайси мероси ғайримоддии умумиҷаҳонӣ пазируфта шуда, имрӯз ҳамчун ҷашни ҷаҳонӣ таҷлил мегардад. Дар Донишкадаи давлатии санъати тасвирӣ ва дизайн низ чун анъана аз замони таъсиси муассиса дар баҳори соли 2013 то имрӯз ин ҷашни миллӣ бо намоиши корҳои эҷодии рассомии омӯзгорону донишҷӯён таҳти унвони рамзии “Аз Наврӯз то Наврӯз” истиқбол гирифта мешавад, ки нишонаи арҷгузории аҳли санъат ба ин ҷашни миллист. Ҳамасола дар арафаи Иди Наврӯз барпо намудани намоиши асарҳои рассомӣ ва наққошии омӯзгорон, ки дорои ҳунари волои рассомӣ ва узви Иттифоқи рассомони Тоҷикистонанд, ба рушди ин санъат дар донишкада ва дар маҷмӯъ тамоми ҷумҳурӣ мусоидат мекунад”, – гуфт ректор.
Сипас, Давлат Сафарзода суханронӣ намуд. Ӯ гуфт, дар арафаи ҷашни Наврӯз ташкил намудани намоиши асарҳои устодон фоли нек аст, зеро ҳамаи он ташаббусҳое, ки Пешвои миллат ба хотири байналмилалӣ гардонидани ҷашни Наврӯз анҷом доданд, маҳз дар ин асарҳо инъикоси васеъ шудаанд.
“Наврӯз пайвандгари дилҳост. Ҳар касе, ки Наврӯзро таҷлил мекунаду аз он бо ифтихор ёд меоварад, таърихро мешиносаду ба фарҳанг арҷ мегузорад, зеро Наврӯз шаҳодатномаи таъриху тамаддуни миллати тоҷик аст”, – гуфт муовини вазири фарҳанг.
Дар идома Наргис Ҳамидова суханронӣ карда, зикр намуд, ки дар доираи ин чорабинии фарҳангӣ баргузор гардидани намоиши эҷодӣ боиси ифтихор аст, чунки дар васфи Наврӯзи хуҷастапай, ки таърихи беш аз шашҳазорсола дорад, рассомону эҷодкорон пайваста таваҷҷӯҳ менамоянду Наврӯзу баҳор яке аз мавзӯъҳои марказии рассомону эҷодкорон аст.
Баъди ин, дар вазъияти тантанавӣ ба Шералиева Умеда, омӯзгори кафедраи мусаввирӣ ва ҳайкалтарошии факултети санъати тасвирӣ, шаҳодатномаи узвият ба Иттифоқи рассомони Тоҷикистон супорида шуд.
Пас аз маросими ифтитоҳи расмӣ ҳайати меҳмонон асарҳои дар намоишгоҳ пешниҳодшударо тамошо карда, ба майдони наврӯзӣ ташриф оварданд. Онҳо бо намоиши дастовардҳо ва ҳунарҳои мардумии донишҷӯёни факултаҳо шинос шуда, ба маҳорату истеъдоди онҳо баҳои баланд додаанд.
Дар қисмати тантанавии чорабинӣ Сафарзода Давлат Шариф табрикоти вазири фарҳангро ба самъи устодону донишҷӯён расонида, гуфт, Наврӯз ҷашни покӣ, меҳрубонӣ ва дӯстӣ мебошад, ки ниёгони мо онро аз қаъри ҳазорсолаҳо мерос гузоштаанд. Наврӯзи имсола ба Тоҷикистони биҳиштосои мо бо фазои сулҳу салоҳ, ваҳдату ҳамдилӣ фаро расид, ки ин ҳама шаҳодат аз суннатҳои асосии наврӯзӣ аст.
“Наврӯз ҳамчун рукни фарҳангӣ ва нигоҳдорандаи асолати миллии мо тоҷикони дунё мебошад, яъне забон, урфу одати ҷашнҳо зебоиписандиву ахлоқи ҳамида, андӯхтани дониш ва ҳамсоли онҳоро ташкил медиҳад. Ягона унсуре, ки фарҳанги миллӣ, ё фарҳанги наврӯзиро мустаҳкам нигоҳ дошт, ин забони тоҷикӣ мебошад. Мо халқи тоҷик хушбахттарин халқем. Хушбахтии мо дар он аст, ки дар ҷашни Наврӯз тамоми ҳалқҳои Осиёи Миёна ҳамдигарро бо ибораи тоҷикии “Наврӯз муборак ”табрику муборакбод менамоянд. Ман низ ба ин табрикот ҳамроҳ шуда, аз номи роҳбарияти Вазорати фарҳанги мамлакат дар ин ҷашни бузурги аҷдодиамон ба ҳамаи шумо муборакбод мегӯям”, – гуфт муовини вазири фарҳанг зимни суханрониаш.
Баъди ин, дар вазъияти тантанавӣ ба як қатор омӯзгорону донишҷӯёни муассиса Ифтихорнома ва Сипосномаи Раёсати Донишкада ва Иттифоқи касабаи кормандони маориф ва илм тақдим карда шуд.
Чорабинӣ бо барномаи фарҳангии иборат аз рақсу суруд дар иҷрои ҳунармандони Донишкадаи давлатии фарҳанг ва санъати Тоҷикистон ба номи Мирзо Турсунзода, Консерваторияи миллии Тоҷикистон ба номи Талабхӯҷа Сатторов ва Коллеҷи санъати шаҳри Душанбе ба номи Аҳмад Бобоқулов идома ёфт. Дар он ҳамзамон, ҳунарманди шинохтаи кишвар Содиқ Холов ба сифати меҳмони ифтихорӣ иштирок намуда, бо таронаҳои хеш табъи ҳозиринро болида гардонид.
