Имрӯз дар толори калони Донишкадаи давлатии санъати тасвирӣ ва дизайни Тоҷикистон ба шарафи 30-солагии Истиқлолияти давлатии Ҷумҳурии Тоҷикистон ва 20-солагии Созмони ҳамкории Шанхай (СҲШ) намоиши асарҳои  рассомии омӯзгорони амалкунанда ва собиқи ин муассисаи олии таълимӣ оғоз ёфт.

Намоишро ректори донишкада, номзади илмҳои меъморӣ Ғанизода Ҷамшед Шуҷоат кушода, тамошобинони сершуморро ба муносибати 30-солагии Истиқлолияти Ҷумҳурии Тоҷикистон ва кушодашавии ин намоиш табрику таҳният гуфт ва таъкид намуд, ки дар донишкада рассомони боистеъдод аз ҳисоби омӯзгорон хеле зиёд буда, аксари онҳо ба узвияти Иттифоқи рассомони Тоҷикистон пазируфта шудаанд.

Сипас, намояндаи Вазорати фарҳанги Тоҷикистон Абдуразоқ Самеъзода,  раиси Иттифоқи рассомони Тоҷикистон Наргис Ҳамидова, Арбоби ҳунари Тоҷикистон, декани факултети дизайн Мизроб Холов, санъатшинос Манзура Улҷабоева омӯзгорони эҷодкореро, ки асарҳояшон ба намоиш гузошта шудаанд ва ҳама иштирокчиёни намоишро ба муносибати кушодашавии ин чорабинӣ табрик гуфта, зикр намуданд, ки ташкил кардани чунин чорабиниҳо дар донишкада ба ҳукми анъана доромадааст.

Намоиш беш аз 50 асари 25 омӯзгори донишкадаро дар бар мегирад.

Дар ин ҷо дар қатори асарҳои устодони пуртаҷрибаи санъати рассомӣ – Рассоми халқии Тоҷикистон, профессор Исуф Сангов, Арбобони ҳунари Тоҷикистон профессор Мизроб Холов, Акмал Миршакар, ҳайкалтарош Аҳтам Сафаров ва рассоми шинохта, собиқ раиси Иттифоқи рассомони Тоҷикистон, декани факултети санъати тасвирии донишкада, марҳум Фаррух Хоҷаев, инчунин асарҳои рассомони ҷавони боистеъдод-омӯзгорон Мадина Ғиёсова, Парвини Ғаффор, Беҳзод Боймуродов, Беҳрӯз Забиров, Ҳалим Исмоилов, Эркин Суюнов, Равшан Рӯзибоев ва Умеда Мардихудоева ба намоиш шукуҳу шаҳомати тоза мебахшанд. Бахусус асарҳои Умеда Мардихудоева “Субҳи Помир”, “Деҳаи ман”, “Оби равон”, ки  тобистони имсол ба тозагӣ эҷод шуда, манзараҳои зебову нотакрори деҳоти Бадахшони Тоҷикистонро  бо маҳорати баланд инъикос намудаанд, сазовори баҳои баланди тамошобинон гардиданд.

Намоиш 15 сентябр оғоз ёфта, то 15 октябр идома меёбад.