Дар Донишкадаи давлатии санъати тасвирӣ ва дизайни Тоҷикистон бо ибтикори кафедраи Забонҳо ва фанҳои гуманитарӣ ва иштироки васеи донишҷӯён аз рӯи асари Пешвои миллат муҳтарам Эмомалӣ Раҳмон «Забони миллат-ҳастии миллат» мизи мудаввар баргузор гардид.

Субҳон Усмонов, мудири кафедраи Забонҳо ва фанҳои гуманитарии донишкада мизи мудавварро бо сухани муқаддимавии тавсифӣ роҷеъ ба  забон ҳамчун воситаи муҳими муошират ва унсури бақои давлат оғоз намуда, сипас дотсенти кафедраи забонҳо ва фанҳои гуманитарии донишкада Сайнурдин Акобиров доир ба мақоми забони тоҷикӣ-форсӣ дар мамолики Шарқ ва саҳми он дар рушди тамаддуни башарӣ, донишҷӯёни факултетҳои дизайн ва санъати тасвирӣ Мунисаи Нуриддин, Мадина Рафиева, Хадича Одинаева, Суман Азизова, Мастоншо Саёдатшоев, Алмира Тӯтишоева ва дигарон перомуни асари сеҷилдаи Пешвои миллат Эмомалӣ Раҳмон “Забони миллат-ҳастии миллат” бо се забон – тоҷикӣ, русӣ ва англисӣ маърӯзаҳо қироат карданд.

Дар мизи мудаввар меҳмонон доктори илмҳои филология, профессор Абдулҳамид Нозимов аз филиали МИСиС дар шаҳри Душанбе, профессор Ҷамшед Парвонаев аз Академияи миллии илмҳои Тоҷикистон, , номзади илмҳои педагогӣ, дотсент Баҳром Зулфонов аз Пажуҳишгоҳи рушди маорифи Академияи таҳсилоти Тоҷикистон иштирок намуда, аз баргузории чорабинӣ  дар сатҳи баланд изҳори қаноатмандӣ карданд.