Истиқболи Иди Наврӯз дар Донишкадаи давлатии санъати тасвирӣ ва дизайни Тоҷикистон таҳти унвони “Аз Наврӯз то Наврӯз” дар толори калону барҳавои донишкада аз намоиши асарҳои омӯзгорони худи таълимгоҳ —  рассомону дизайнерон бо сухани муқаддимавии ректори донишкада, номзади илмҳои меъморӣ Ғанизода Ҷамшед Шуҷоат оғоз ёфт.

Дар ин ҷо намоиши зиёда аз ҳаштод асари тозаэҷоди рассомию кандакории беш аз бист рассомон — омӯзгорони шинохтаи ҷумҳурӣ, аз ҷумла  И. Сангов, А. Миршакаров, М. Холов, С. Шарифов, С. Маҳмудов, Н. Ҳамидова,  А. Меҳриддин, М. Рақибов, Ҳ. Искандаров, К. Наҷмиддинов, ки аксарият узви Иттифоқи рассомони Тоҷикистон мебошанд, пешкаши тамошобинон гардонида шуданд.

Ба қавли ректор, ҳарчанд тантанаи ин иди пуршукӯҳ аз соли аввали таъсисёбии донишкада (баҳори соли 2013) ба ҳукми анъана даромадааст, Наврӯзи имсолаи донишгоҳӣ бо навгониҳои худ, хоса афзоиши шумораи иштирокчиёни намоиш ва арсарҳои нави замонавии ба намоиш гузоштаи онҳо ва ҳам дар остонаю тараддуди сазовор пешвоз гирифтани ҷашни  30 –солагии Истиқлолияти давлатии Ҷумҳурии Тоҷикистон таҷлил гардиданаш аз Наврӯзҳои солҳои гузашта тафовут дорад.

Сипас, муовини вазири фарҳанги ҷумҳурӣ Қурбоналӣ Абдураҳимзода, раиси Иттифоқи рассомони Тоҷикистон Наргис Ҳамидова, директори коллеҷи ҷумҳуриявии рассомии ба номи М. Олимов Сироҷиддин Ҷӯрахонзода, омӯзгори коллеҷи мазкур Сабоҳат Мухторова, рассоми шинохтаи ҷумҳурӣ, профессори донишкада Исуф Сангов, муаллими донишкада Барим Неъматуллоев,  собиқадори меҳнат Асадулло Сулаймонов ба сухан баромада, омӯзгорону донишҷӯёни донишкадаро бо Наврӯзи баҳори хуҷастапай табрик гуфта, дар фаъолияти таълимию касбомӯзии онҳо барор хостанд.

Тантанаи Наврӯз баъд аз тамошои намоиши асарҳои омӯзгорон дар ҳавлии донишкада бо намоиши маҳсули эҷоди донишҷӯёни факултетҳои санъати тасвирию дизайн  баргузории консерту намоиши театрикунонидашуда ва озмуни “Маликаи Наврӯз” идома ёфт. Абдалла  София – магистранти курси якуми донишкада ғолиби озмуни “Маликаи Наврӯз” гардид.

Дар охир чанде аз донишҷӯён — иштирокчиёни фаъоли мусобиқаҳои эҷодию варзишии қаблан баргузоршуда бо Ифтихорномаи раёсати донишкада қадрдонӣ шуданд.