13 феврали соли ҷорӣ дар Донишкадаи давлатии санъати тасвирӣ ва дизайни Тоҷикистон нишасти матбуотии Донишкада вобаста ба ҷамъбасти фаъолият дар нимсолаи дуюми соли 2022 баргузор гардид.
Дар нишаст теъдоди зиёди намояндагони расонаҳои иттилоотӣ, аз қабили шабакаҳои телевизионии «Сафина», «Душанбе HD», «Ҷаҳонамо», рӯзномаҳои «Ҷумҳурият», «Паёми Душанбе», «Баҳори аҷам», «Омӯзгор», радиои «Тоҷикистон», «Садои Душанбе» ва ғайраҳо иштирок намуда, ба саволҳои худ посухҳои мушаххас гирифтанд.
Дар оғоз Ректори Донишкада номзади илмҳои меъморӣ, профессор Ғанизода Ҷамшед Шуҷоат рӯзноманигоронро хайрамақдам гуфта, оид ба дастовардҳо дар соли 2022 ва нақшаҳои ояндаи Донишкада ба таври мухтасар ба рӯзноманигорон иттилоъ дод.
Ёдовари карда шуд, ки нишасти матбуотии мазкур дар арафаи таҷлил аз даҳсолагии таъсисёбии Донишкада рост меояд. Донишкадаи давлатии санъати тасвирӣ ва дизайни Тоҷикистон дар давоми даҳ соли фаъолияти худ ҳамчун мактаби олии касбӣ ташаккул ёфта, имрӯз дар қатори муассисаҳои таҳсилоти олии кишвар ҷойи сазоворро ишғол менамояд. Донишкада соли 2013 бо ибтикори бевоситаи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ташкил шуда, аввалин муассисаи мустақили давлатӣ мебошад, ки мутахассисонро дар соҳаи санъати тасвирӣ ва дизайн дар дараҷаи бакалавр, магистр ва доктор (PhD) тайёр мекунад.
Теъдоди умумии донишҷӯён дар давраи ҳисоботӣ 1420 нафарро (ба ҳолати 04.02.2023) ташкил медиҳанд, ки аз ин дар факултети санъати тасвирӣ 343 нафар (24%), дизайн 464 нафар (33%), тайёрӣ ва таҳсилоти фосилавӣ 561 нафар (40%) ва бахши магистратура, аспирантура ва докторантура 52 нафар мебошанд.
Зимни суханронӣ қайд намуданд, ки Донишкада имрӯз аз рӯйи 26 ихтисос барои тайёр кардани мутахассисони соҳаи санъати тасвирӣ ва дизайн тариқи пулакӣ, буҷавӣ бо ду забон-тоҷикӣ ва русӣ (ихтисоси дизайни костюм ва газвор) амал менамояд.
Таъкид гардид, ки дар Донишкада ба донишҷӯён беҳтарин рассомон, аз ҷумла Арбобони ҳунари Тоҷикистон, профессорону дотсентҳо бо истифода аз методу усулҳои муосири таълим дарс мегӯянд. Ҳамаи синфхонаҳо дорои шароиту имкониятҳои муосири таълим буда, бо таҷҳизоти пешрафта таъмин мебошанд. Ҳайати профессорону омӯзгорони Донишкадаро дар соли ҳисоботӣ 3 нафар профессор-доктори илм, 2 нафар профессор-номзади илм, 3 нафар профессори бе унвон, 5 нафар дотсент-номзади илм, 3 нафар и.в. дотсент-номзади илм, 2 нафар дотсенти бе унвон, 31 нафар муаллими калон, 40 нафар муаллим ва дигаронро ассистентҳо ташкил медиҳанд.
Устод бо хурсандӣ ва сарфарозӣ ёдовар шуданд, ки имсол пешниҳоди Раёсати Донишкадаи давлатии санъати тасвирӣ ва дизайни Тоҷикистон ва ташаббуси бевоситаи Вазорати фарҳанги Ҷумҳурии Тоҷикистон дар бораи ворид намудани ду номинатсияи дигар, яъне санъати тасвирӣ ва дизайн дар Низомномаи озмуни ҷумҳуриявии “Тоҷикистон-Ватани азизи ман” аз тарафи Ҳукумати Ҷумҳурии Тоҷикистон дастгирӣ ёфта, санаи 2 феврали соли 2023 Амри Президенти Ҷумҳурии Тоҷикистон, ҷиҳати гузаронидан ва тасдиқи Низомномаи озмуни мазкур дар соли 2023 ба имзо расид (02.02.2023, №АП-329), ки бори дигар аз таваҷҷӯҳи хосаи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон нисбат ба соҳаи санъати тасвирӣ ва дизайн дарак медиҳад.
Бинобар ин, ҳайати профессорону омӯзгорони Донишкадаро зарур аст, ки барои дар амал тадбиқ намудани иқдоми навбатии Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон камари ҳиммат баста, баҳри рушди соҳаи санъати тасвирӣ ва дизайн кӯшиши дучанд намоянд.
Хотирнишон намуданд, ки моҳи октябри соли 2022 дар Донишкада 16-умин бозиҳои Делфии ҷавонони давлатҳои иштирокчии Иттиҳоди Давлатҳои Мустақил дар равияи “Санъати тасвирӣ” ва “Ҳунарҳои халқӣ” баргузор гардид. Донишҷӯёни Донишкада дар озмуни мазкур аз рӯйи равияҳои “Санъати тасвирӣ” ва “Ҳунарҳои бадеӣ” иштирок намуда сазовори медали тилло, нуқра ва биринҷӣ гардиданд. Дастоварди мазкурро дар чунин як озмуни сатҳи байналхалқӣ метавон ба ҳайси яке аз муҳимтарин дастовардҳои сол барои ҳайати омӯзгорон ва донишҷӯёни Донишкада номид.
Ҳамзамон зикр гардид, ки дар давраи ҳисоботӣ дар донишкада 2-конференсияи илмӣ–назариявии ҷумҳуриявӣ, 4 конференсияҳои илмӣ-назариявии кафедравӣ гузаронида шуд. Дар ин замина таъкид намудан ба мавридаст, ки дар соли мазкур маводҳои конференсия дар ҳаҷми 4-номгӯ ба чоп расида, 2-номгӯи дигар дар ҳоли чоп қарор дорад. Дар ин давра 13 намоишҳои инфиродӣ, донишкадавӣ ва байналмиллалӣ бо иштироки бевоситаи ҳайати профессорону омӯзгорони Донишкада гузаронида шуд.
Дар самти корҳои тарбиявӣ бошад Устод ёдовар шуданд, ки дар давоми даҳ соли фаъолияташ Донишкада як қатор корҳоро ба анҷом расонид. Аз ҷумла дар ин давра, зиёда аз 450 номгӯи чорабиниҳои расмӣ-фарҳангӣ, сиёсӣ, илмию маърифатӣ ва варзишию солимгардонӣ гузаронида шуд. Агар дар соли аввали фаъолият дар як сол 9-10 чорабинӣ баргузор мешуд, ҳоло бошад ба 61 адад расонида шудааст.
Зимнан таъкид гардид, ки бо мақсади рушди соҳаи санъати тасвирӣ ва дизайн, раёсати Донишкада дар давраи фаъолияти худ аз соли 2013 то инҷониб бо 9 донишгоҳу донишкадаҳои хориҷӣ, бо 2 академияи миллии дигар давлатҳо ва инчунин бо зиёда аз 50 ташкилотҳои дохилӣ бо мақсади гузаронидани таҷрибаомӯзӣ, такмили ихтисос ва таъмин бо ҷои кор равобити ҳамкорӣ дорад.
Дар давраи ҳисоботӣ барои меҳнати софдилона ва бисёрсола 10 нафар омӯзгорони Донишкада бо Сипосномаи ҲХДТ, 10 нафар бо Ифтихорномаи Кумитаи ҷавонон ва варзиши назди Ҳукумати Ҷумҳурии Тоҷикистон, инчунин дар давраи ҳисоботӣ 2 нафар бо нишони “Аълочии фарҳанги Ҷумҳурии Тоҷикистон”, 1 нафар бо нишони “Аълочии матбуоти Тоҷикистон”, 4 нафар бо нишони “Аълочии маориф ва илми Ҷумҳурии Тоҷикистон”, 9 нафар бо Ифтихорномаи вазоратҳои фарҳанг ва маориф ва илми Ҷумҳурии Тоҷикистон, 15 нафар бо Ифтихорномаи Иттифоқи касабаи кормандони соҳаи маориф ва илми Ҷумҳурии Тоҷикистон ва 25 нафар омӯзгорон ва кормандон бо Ифтихорнома ва Сипосномаи Раёсати Донишкада қадрдонӣ карда шуданд.
Ҳамзамон, дар арафаи таҷлили 31-умин солгарди Истиқлолияти давлатии Ҷумҳурии Тоҷикистон 3-нафар кормандони Донишкада бо мукофотҳои давлатӣ сарфароз гардонида шуданд, ки ин дастоварди бузург дар соли 2022 ба ҳисоб мерафт.
Дар фарҷом Раёсати Донишкада ба саволҳои рӯзноманигорон, ки дарбаргирандаи фаъолияти рӯзмарра ва нақшаҳои ояндаи Донишкада буд, ба таври мухтасар ва комил посух гуфта, барои иштироки фаъолона дар нишасти матбуотӣ изҳори миннатдорӣ намуда, онҳоро ба ҳамкории мутақобилан судманд даъват намуданд.
