Таҳти ҳамин ном 2 сентябр дар Осорхонаи миллии Тоҷикистон бахшида ба 30-солагии Истиқлолияти давлатии Ҷумҳурии Тоҷикистон ва 55-солагии фаъолияти эҷодии Рассоми халқии Тоҷикистон, дорандаи Ҷоизаи давлатии ба номи Абуабдулло Рӯдакӣ Сабзаалӣ Муродзодаи Шариф намоиши асарҳои ӯ ботантана оғоз ёфт. Дар қисми тантанавии ин намоиш дар қатори чанде аз донандагони санъати тасвирӣ ва муҳаққиқон роҷеъ ба фаъолияти эҷодии рассоми боистеъдоди тоҷик ва иртиботи худи ӯ ба Донишкадаи давлатии санъати тасвирӣ ва дизайни Тоҷикистон ректори донишкадаи мазкур Ғанизода Ҷамшед Шуҷоат баромад карда, андешаҳояшро чунин иброз дошт:
Намоиши имрӯзаи асарҳои Рассоми халқии Тоҷикистон, дорандаи Ҷоизаи давлатии ба номи Абуабдуллоҳ Рӯдакӣ Сабзаалӣ Муродзодаи Шариф бахшида ба 30-солагии Истиқлолияти давлатии Ҷумҳурии Тоҷикистон таҳти унвони “Аз дуриҳо ба нуриҳо”, ки ҳоло бо тантана оғоз ёфт, бори аввал нест. Ҳунарманди асил Сабзаалӣ Муродзода ба истиқболи ҳар як санаи таърихии ҷумҳурии соҳибистиқлоли мо қаблан омодагӣ гирифта, асарҳои аз ҳама ҷиҳат мукаммалу хотирнишин эҷод мекунад ва онҳоро таҳти унвоне манзури мухлисони эҷодиёти худ ва шефтагони олами санъати тасвирӣ мегардонад.
Баргузории намоиши асарҳои Сабзаалӣ Муродзодаи Шариф 3 сентябри соли 2016 ба шарафи 25-солагии Истиқлолияти давлатии Ҷумҳурии Тоҷикистон, ки дар он рассом рамзан 25 асари тозаэҷоди худро дар бораи таърихи гузаштаю ҳаёти имрӯзаи халқи тоҷик, фарзандони фарзонаи он Спитамен, Темурмалик ва ғайра ба намоиш гузошт, чандин намоиши дигари асарҳои ӯ, ки ҳамасола ва ё солдармиён дар дохил ва хориҷи кишвар ташкил карда мешаванд, ба ин далел шуда метавонад.
Рассом Сабзаалӣ Муродзодаи Шариф ба таълимгоҳи олии мо – Донишкадаи давлатии санъати тасвирӣ ва дизайни Тоҷикистон алақаи зич дошта, ба ҳисобе дар ҳайати омӯзгорони ин донишкада аст. Дар ин ҷо ӯро хурду калон мешиносанд, асарҳояшро меомӯзанд, барояш эҳтироми хоса қоиланд. Имсол дар толори калони донишкада ду маротиба намоиши асарҳои ӯ дар сатҳи баланд ташкил карда шуд. 8 май дар донишкада бо иштироки васеи ҳаводорони асарҳои ӯ, меҳмонон, санъатшиносон ва аҳли адаби ҷумҳурӣ 75-солагии рассом бо намоиши муҳташами асарҳои ӯ ботантана таҷлил карда, бо эҳтимоми бахши табъу нашри донишкада тавассути сомонаи интернетӣ ва васоити ахбори оммаи ҷумҳурӣ эҷодиёти рассом Сабзаалӣ Муродзодаи Шариф ба таври васеъ тарғиб карда шуд. Ман бо итминони комил гуфта метавонам, ки Донишкадаи давлатии санъати тасвирӣ ва дизайни Тоҷикистон ва парвардагони он дар оянда аз ворисони сазовори эҷодиёти Рассоми халқии Тоҷикистон Сабзаалӣ Муродзодаи Шариф хоҳанд шуд.
Имрӯз худро вазифадор мешуморам, ки аз номи ҳайати устодони донишкада ва шахсан худам устод Сабзаалӣ Муродзодаи Шарифро барои чунин як иқдоми ватандӯстона – ташкили намоиши пурмуҳтавои асарҳои тозаэҷодаш ба шарафи 30-солагии Истиқлолияти Ҷумҳурии Тоҷикистон самимона табрик гуфта, ба ӯ комёбиҳои тоза ба тозаи эҷодӣ таманно намоям.
Аз дуриҳо ба нуриҳо
